ناوخۆی عراق دەس کەێد وە تێکەڵکردن زانیارییەیل کارت نیشتەجێبۊن لە کارت نیشتمانی یەکگرتگ
شەفەق نیوز - وەدۊاچگن
وەزارەت ناوخۆی عراق، ئمڕوو یەکشەممە، راگەیان وە دەسکردن وە ریکارەیل تێکەڵکردن زانیارییەیل کارت نیشتەجێبۊن لەناو کارت نیشتمانی یەکگرتگ، وە ئامانج یەکخستن بەڵگەنامە فەرمییەیل و کوڵکردنە وەخت و مانیبۊن ئەرا ئەنجامداین مامەڵە حکومەتییەیل.
سەرۆک فەرمانگەی راگەیانن و پەیوەندییەیل لە وەزارەتەگە، لیوا میقداد میری، لە لێدوانیگ ئەرا رووژنامەی فەرمی ئاشکرا کرد کە "ستافەیل وەڕێوەبەرایەتی رەگەزنامە و زانیارییە مەدەنییەیل دەس کردنەسە ریکارەیل نووکردن ئەلیکترۆنی ئەرا زانیارییەیل نیشتەجێبۊن، لەڕی وازکردن هۆبەیل تایبەتمەن وەو کارە لە بەغداد و پارێزگایەیل، لەناو پڕۆژەیگ تەواو کە ئامانجی پشتبەسینە وە کارت نیشتمانی جۊر بەڵگەنامەیگ سەرەکی کە گشت زانیارییە کەسییەیل هاووڵاتی لەخوەی گرێد، لە ناویان زانیارییەیل نیشتەجێبۊن".
دیاریش کرد کە "سیستەمە نووەگە ری ئەرا هاووڵاتییەیل واز کەێد ئەرا وەکارهاوردن ئەپلیکەیشنیگ ئەلیکترۆنی لەڕی مۆبایلەیلەو، ئەرا ئاگاداربۊن لە زانیارییەیل نیشتەجێبۊن و نووکردنەوەیان وە شیوەی ئەلیکترۆنی لەڕی شمارەی نیشتمانی چەسپیاگ لە کارت نیشتمانی یەکگرتگ، وەبێ هەوەجەکردن وە دەرکردن بەڵگەنامەیگ نوو یا دروسکردن بەڵگەنامەیگ ترەک، چۊنکە پشتبەسین تەنیا لەبان کارت نیشتمانی بوود لە گشت مامەڵەیل".
میری ئاماژەیش دا وە "گرنگی ئی ریکارە، وەختێگ تەنیا لەبان کەمەوکردن شمارەی بەڵگەنامە فەرمییەیل سنووردار نیەوود، بەڵکم بەشداری کەێد لە سووککردن بارگرانییە رووژانەیل لەبان هاووڵاتییەیل، و کەمووکردن هەوەجە وە سەردانکردن فەرمانگەیل وەزارەت ناوخۆ، بیجگە لە خێراکردن ئەنجامداین مامەڵەیل و ئاسانکردن ریکارە کارگێڕییەیل، لەڕی بەسکردن وە یەک بەڵگەنامەی فەرمی".
لە خود چوارچێوەیش سەرنج دا وەرەو ئەوەگ کە پڕۆژەگە تیەێد لەناو ریڕەویگ فراوانتر کە ئامانجی نووەوکردن سیستەم بار شارستانی پەسەنکریاگە، و گواستنەوەی پلە وە پلە وەرەو پێشکەشکردن خزمەتگوزارییە حکومەتییەیل وە شیوەی ئەلیکترۆنی وە تەواوی، وە شیوەیگ کە بگونجێد وەرد پێداویستییەیل پرۆسەی وەرچەرخان دیجیتاڵی کە ئیسە کار لەبانی کریەێد، بیجگە لە بەشداریکردنی لە هازدارکردن کارامەیی کار دامەزراوە حکومەتییەیل، هاووەخت وەرد ئاسانکردن وەدەسهاوردن خزمەتگوزارییەیل لەلایەن هاووڵاتییەیلەو.