کۆڕۆنا هالە گشت شوونیگ.. عراق کەفێدە قۆناغ بڵاو بوین بەرز وزوینە لە پەتاگە
شەفەق نیوز/ وەرپرسیگ لە وەزارەت تەندروسی عراق، ئمڕوو شەممە، ئاشکرا کرد ک عراق چیە ناو قۆناغ بڵاو بوین ڤایڕۆس کۆڕۆنا وە شیوەی بەرز وزوینە، وئاماژەدا ک پەتاگە هالە گشت شوونیگ، وپێشبینی کرد لە هەفتەیل ئایندە تووشهاتنەگان زیایەوبوون.
عەباس عوەید حوسەینی، ئەندام شانەی قەیرانەگە لە فەرمانگەی تەندروسی رەسافە وت: پێشبینە ژمارەی تووشهاتنەگان وە ڤایڕۆس کۆڕۆنا زیایەو بوود ئەرا زیاتر لە ٣٠٠٠ تووشهاتگ لە رووژیگ لە ماوەی هەفتەیل ئایندە، لەوەر فراوان بوین بردن نموونەگان ئەرا تاقیکردنەوە ک رووژانە لە ١٨ هەزار نموونە رەدکرد، و ئەیە نشانەی خاسیگە، و ئومید هەس ک بڕەسێدە ٢٥-٥٠ هەزار نموونە لە رووژیگ.
حوسەینی وتیش: هەرچەنی ژمارەی تاقیکردنەگان بەرزەو بوود ژمارەی تووشهاتنەگان هەمیش بەرزەوبوود، و فرە لە هاووڵاتیەگان وەراسی رەفتار وەگورەی مەترسی بیماریەگە نێکەن ، و پابەندی وە دویرەوکەفتن کۆمەڵایەتی نەیرن، وەتایبەت ئەوەگ لە جەژن قوربان بوی، ک خیزانەگان چووچیانە ناو باخچە گشتیەگان لە نزیک ماڵەیلیان لەوەر بڕین کەهرەبا.
هەمیش وت: عراق لە سێ هەفتەو چیەسە ناو قۆناغ بڵاوبوین بەرز و خێرا، واتە پەتاگە هالە گشت شوونیگ و لەناو مەردم جووڵە کەێد وەبی زانستن سەرچەوەی تووشهاتنەگە، وفرەی تووشهاتگەیل تووشهاتن خوەیان نێزانن، هەرچەن پابەند بوینە وە مقەیەتی خوەیان، و گشت تووشهاتنە ئاشکراکریایەگان پەتاگە لە وەقیەوداگ و نزیک وەریگردن، یا کەسیگ ئەرا خیزانیان یا قەومیان هاوردەی، وەبی هەست کردن وە کاریگەریەگانی.
حوسەینی رەخنە له ئەو بیمارەیلە گرت ک سەرداین خەسەخانەگان نێکەن ئەرا تاقیکردنەوە لەوەختیگ زویتر، تا لە راسیەگەی بزانێد ئەگەر تووشهاتگە یا نە.
حوسەینی جەختکرد لەبان پابەندبوین کادرە پزشکی وتەندروسیەگان وەسەختترین ریکارەیل مقیەتی ئەرا مقەیەتی خوەیان لە بیماریەگان، ومەترسیەگەی وە ئاسان نەدوینن، و داوا لە هاووڵاتیەیل کرد دەمامەک ودەسکیش وەکاربارن و دویرەوکەفتن کۆمەڵایەتی، چوونکە سەرچەوەی تووشهاتنەگە نادیارە، و وەجیهاوردن ریکارەگان لەنوای پێشێلکارەیل، و هەمیش چەسپانن باج لەوەختیگ نا پابەندی بوود وەمقیەتیە تەندروسیەگان.
