ژن و ژنخوازی لە کورد لە چەو ئاخونیگ لە کەناڵیگ شیعە ناوەندیگ مافپەروەر تیارێدە دەنگ
شەفەق نیوز/ ناوەند "نەخیل" ئەرا ماف و ئازادیەیل رووژنامەوانی، شەرمەزار ئەو کرد ک "کەناڵ ئەنوار" پەخشی کردیە، لە قسەی بەدیگ وەبان کورد، ک ململانەی نەتەوەیی و مەزهەوی دروس کەێد.
ناوەندەگە لە بەیاننامەیگ ئمڕوو وت: نووسەرەیلیگ پارچە ڤیدیۆیگ لە بەرنامەیگ ئاینی لە کەناڵ ئاسمانی ئەنوار بڵاو کردن، سوکایەتی نەتەوەگەری ئاشکرایگ وەرانوەر کورد هاناوی، و هەمیش ململانە و ئاژاوەی نەتەوەگەری و مەزهەوی دروس کەێد، و تەقەلایگ دەێد ئەو کارە وە شیوەیگ شەرعی وئاینی بپووشێد.
بەیاننامەگە وتیش: لەو وەختەگ دووپات لەبان میدیایل راگەیانن لە گرنگی چەودیریکردن باوەت ئەو وتارە بکەێد ک پیشکەشی کەێد، و دویرە بکەفێد لە هەر چشتیگ سوکایەتی وە پیکاتەیل گەل عراق و ڕەفتار و رسوومەیلی کەێد، ئیمە داوای جیوەجیکردن گشت ریکارەیل یاسایی وەگەرد ئەو میدیایل راگەیاننە کەیمن، ک وە زانستەنی ئیجویر وتاریگ سوکایەتی پەخش کەێد، و پابەند وە ڕینمایی کار راگەیان و رووژنامەوانی پیشەیی نیەوود.
جی باسە ک کەناڵ "ئەنوار" ئاسمانی شیعە، پارچە ڤیدیۆیگ ئەرا ئاخونیگ وەناو حسێن ئەمیری پەخش کرد، باس (مەکروە)یەت ژن و ژنخوازی وەگەرد چەن میلەت و نەتەوەیگ کرد، کوردیش هاناویان، چوینکە کورد میلەتیگە لە "جن" و پشت وە ریوایەتەیلیگ لەناو کتاوەیل شیعە بەسایە، ک گوایە ژن و ژنخوازی وەگەردیان بەدە و نەخوازیاگە، وەسنگ جیاوازی رەفتار و رسوومەیل ناوبەینیان.
