مزگانییگ دەربارەی کۆڕۆنای عراق
شەفەق نیوز/ دەسەی تەندروسی لە پەرلەمان عراق، ئمڕوو یەکشەممە، ئاشکراکرد ک ڤاێرۆس کۆرۆنا هێزەگەی لەدەسبردگە، وەگورەی ئاماژە وبەڵگە زانستی و پزشکیەگان، ودیاری کرد ک فرەی تووشهاتنەگان بیوەین و وەزوی خاسەوبوون.
ئی قسەگە لە تەندروسی پەرلەمان تیەێد هەرچەن تووشهاتنەگان عراق لە ماوەی سێ رووژە دویایینەگە لە ٤ هەزار رەدکرد.
بەڵکم فالح زەیادی ئەندام دەسەگە ئەرا ئاژانس شەفەق نیوز وت: زیاتر لە ٩٠% لە تووشهاتنەگان کۆرۆنا ئاسانەو بویە و وەزوی خاسەوبوود وەگورەی یەکەم مانگەگان لە دەرکەفتن پەتاگە، ودیاری کرد ک عراق بەرزەوبوینیگ لە تووشهاتنەگان تۆمار کەێد وەرانوەر کەمەوبوین لە سەختی تووشهاتنەگە، و ئەیە نشانەیگە ئەرا کەمەوبوین مەترسی کۆڕۆنا لە ماوەیل ئایندە.
زەیادی ئاماژەکرد وە سەرکەفتن کادرە پزشکیەگە لە رەفتاریان وەگەرد ڤایڕۆس کۆڕۆنا لە عراق، لە زیایبوین ئەزمونەیلیان دەربارەی ڤایڕۆسەگە، وزیایبوین چەودیری بیماری ئەرا گیرهاوردن تووشهاتنەگان تا رادەی گەورایگ.
