ئەمریکا سەرلەنوو دەس کەێدەو هاوردەکردن نەفت عراقی وە بڕەیل سنووردار

شەفەق نیوز - بەغداد/ واشنتۆن

وڵاتە یەکگرتگەیل، ماوەی هەفتەی گوزەشتە، سەرلەنوو دەس کردنەو هاوردەکردن نەفت خاو لە عراق، دۊای وسانن هاوردەیل لە هەفتەی وەرجەیە، وەلی ئی بڕەیلە وە سنوورداری مەننەو لە وەراورد ئاست هاوردەیلی لە دابینکەرە گەورەیل.

 داتایەیل ئیدارەی زانیارییەیل وزەی ئەمریکی کە ئاژانس شەفەق نیوز وەدۊای چگ، نیشان دان کە "ناوڕاس هاوردەیل ئەمریکی لە نەفت خاو ماوەی هەفتەی گوزەشتە لە دە دەوڵەت سەرەکی رەسیە رێژەی 4.949 مەلیۆن بەرمیل لە رووژیگ، کە وە بڕ 1.488 هەزار بەرمیل لە رووژیگ داوەزیە لە چاو هەفتەی وەرجە خوەی کە رەسیە رێژەی 6.437 مەلیۆن بەرمیل لە رووژیگ".

وتیش کە هاوردەیل ئەمریکا لە نەفت خاو عراقی رەسیە رێژەی 51 هەزار بەرمیل لە رووژیگ، کە بەرزەو بۊە لە چەو هەفتەی وەرجە خوەی، کە ئەمریکا هیچ بڕیگ لە نەفت خاو عراقی هاوردە نەکردۊد.

 ئیدارەگە دیاری کرد کە "فرەترین هاوردەیل نەفتی ئەرا ئەمریکا ماوەی هەفتەی گوزەشتە لە کەنەداوەو هاتگە وە رێژەیگ رەسیە 3.252 مەلیۆن بەرمیل لە رووژیگ، و وەدۊای ئەوەیش ڤەنزوێلا تیەێد وە رێژەی 583 هەزار بەرمیل لە رووژیگ و لە بەڕازیل وە ناوڕاس 319 هەزار بەرمیل و لە مەکسیک وە رێژەی 238 هەزار بەرمیل لە رووژیگ".

وەپەی خشتەگە، "بڕ هاوردەیل ئەمریکی لە نەفت خاو لە غیانا رەسیە رێژەی 171 هەزار بەرمیل لە رووژیگ و لە سعودیە وە رێژەیگ رەسیە 126 هەزار بەرمیل لە رووژیگ، و لە ئەرجەنتین وە رێژەی 108 هەزار بەرمیل لە رووژیگ، و لە کۆڵۆمبیا وە ناوڕاس 72 هەزار بەرمیل لە رووژیگ و لە نێجیریا وە ناوڕاس 29 هەزار بەرمیل لە رووژیگ".

 ئەمریکا زۊنەی نەفت خاو و دەرهاوردەیلی لەی دە دەوڵەت سەرەکییە هاوردە کەێد، و وەکارهاوردن رووژانەی وڵاتە یەکگرتگەیل لە نەفت وە نزیکەی 20 مەلیۆن بەرمیل مەزەنە کریەێد چۊ گەوراترین وەکارهاور نەفت لە جەهان لەقەڵەم دریەێد..