كۆمپانيايگ چينى دو مانگ وه په‌تى كار وه كارگه‌ره‌يل عراقى كردگه‌و خسته‌سه‌يانه كه‌ره‌نتينه
شه‌فه‌ق نيوز/ كارگه‌ره‌يل عراقى له كۆمپانياى"بوهاى"نه‌فتى چينى، تومه‌تبار ئداره‌ى كۆمپانياگه كردن وه ناچاركردنيان ئه‌را كاركردن ئه‌را ماوه‌ى دو مانگ وه‌په‌تى و بى كرايه‌و دوياخريش ماوه‌ى 14 رووژ كه‌ره‌نتينه‌يان كردگه.
ئه‌و كارگه‌ره‌يله بانگه‌وازيگ ئاراسته‌ى پاريزگار به‌سره و وه‌ڕيه‌وبه‌ر گشتى كۆمپانياى نه‌فت به‌سره‌و وه‌ڕيه‌وبه‌ر سه‌رچه‌وه‌ى نه‌فتى خوه‌رئاواى قرنه2 كردن ك كۆمپانياگه له‌تى كار ئه‌كا.
كارگه‌ره‌يل عراقى له‌و بانگه‌وازه وتنه: ئيمه‌ى كارگه‌ره‌يل كۆمپانياى بوهاى چينى ك له‌سه‌رچه‌وه‌ى نه‌فى قرنه‌ى 2 كار ئه‌كاو شماره‌مان 80 كارگه‌ره، شكايه‌ت خوه‌مان ئه‌را ئيوه به‌رزه‌و ئه‌كه‌يم له‌و زوڵمه ك له‌لايه‌ن كۆمپانياگه‌وه له‌ليمان كرياگه، ك له‌ساى قه‌يران كۆرۆنا و مه‌ترسيه‌يلى ئداره‌ى كۆمپانياگه ناچارمان كرد له‌بان ده‌وام و مه‌ندنه‌وه‌مان ئه‌را ماوه‌ى 2 مانگ و خراوتر له‌وه‌يش خريايمنه كه‌ره‌نتينه ئه‌را ماوه‌ى 14 رووژ وه‌بى كرايه‌و خه‌رجكردن هويچ پويليگ ئه‌رامان له‌و ماوه.
ئه‌و كارگه‌ره‌يله هه‌ميش وتنه: كاركردن له‌و دو مانگه له بوار هه‌ڵكه‌ندن زياتر له تواناى خوه‌ان بويه، يه‌يش له‌وه‌ختيگ ك ئه‌گه‌ر هه‌ر يه‌كيگ له‌ليمان سه‌رپيچى له فه‌رمان كۆمپانياگه بكردياد قاوى دريا له كاركردن،
جى باسه، له‌ى باوه‌ته‌و، ده‌رفه‌ت نه‌وى ئه‌را شه‌فه‌ق نيوز په‌يوه‌ندى وه ئداره‌ى كۆمپانياگه بكا ئه‌را ته‌وزيحكردن زياتر له‌باره‌ى ئى مه‌سه‌له.
