كوه‌يت جواو شكايه‌تيگ عراقى ئه‌ياده‌و له ئه‌نجومه‌ن ئاسايش
شه‌فه‌ق نيوز/ كوه‌يت ئاشكراى ئه‌وه كرد ك وه‌فه‌رمى جواو شكايه‌تيگ عراقى له‌لاى ئه‌نجومه‌ن ئاسايش ناوده‌وڵه‌تى داسه‌و ك له‌تى كوه‌يت تومه‌تبار كرياگه وه هه‌وڵ ئاڵشتكردن سنووره‌يل ده‌ريايى ناونى هه‌ردوگ وڵات.
كوه‌يت له په‌يامه‌گه‌ێ جه‌خت له‌وه كرد ك بنياتناين سه‌كووييگ ده‌ريايى له‌بان ناوچه‌ى«فيشت ئه‌لعيج» هه‌قيگ سه‌روه‌ريه ئه‌ڕاێ و ئه‌و سه‌كووييشه ئه‌كه‌فێده ناو ئاوه‌يل هه‌رێمى خوه‌ێ، يه‌يش له‌وه‌ختيگه حكومه‌ت عراقى ناڕه‌زايى ده‌رخست له‌بان دامه‌زرانن ئه‌و سه‌كووه وه ئه‌وه‌گ كاريگه‌رى ديرێد له‌بان داناين سنووره‌يل ده‌ريايى ناونى هه‌ردوگ وڵات له ناوچه‌ى ده‌ريايى دوياى نيشانه‌ى 162.
له‌و باوه‌تيشه‌و سه‌رچه‌وه‌يگ وه‌رپرس له وه‌زاره‌ت خارجيه‌ى كوه‌يتى له جواودانه‌وه‌ى جه‌خت له‌وه كرد ك وه‌زاره‌ت خارجيه‌ى وڵاته‌گه‌ى ئى ياداشته له شاند هه‌ميشه‌يى نه‌ته‌وه‌يل يه‌كگرتگ وه‌رگرتگه دويا تسليمكردنى وه ئه‌نجومه‌ن ئاسايش و يه‌كسه‌ره‌يش جواوى درياسه‌و.
