یەک قوربانی و زەخمدارەیلیگ لە خۆپیشاندان شەوانەی باشوور عراق
شەفەق نیوز/ چالاکوانەیل مەدەنی، خەوەردان ک شەو جمعە لەبان شەممە، یەک خۆپیشاندەر بویە قوربانی گولەی هێزە ئەمنیەیلە و کەسەیلیگ تر زەخمدار بوین، هەنای دەیان کەس لە پارێزگایل میسان و بەسرە دەرچگنە جادەیل ئەرا داواکردن کارەبا لەسای بەرزەوبوین پلەیل گەرمی وەگەرد هاتن تاوسان.
یەیش لەوەختیگ تیەێد ک سیستەم تووڕ کارەبای نیشتمانی لە وڵاتەگە کەفتە وەر پەککەفتن تەواوی تا چەن ساعەتیگ، و هەرچەن کارەباگە گلەو خوارد، وەلێ هیمان بەشەوکردنەگە کەمە و وەگورەی خوازین مەردمەگە نییە.
چالاکوانەیل وتن؛ ناڕەزایگ وەناو «سەید سەڵاح» کوشیل، و کەسەیلیگ تر زەخمدار بوین، هەنای هێزە ئەمنیەیلە تەقە وەرەو بڕیگ لە ناڕەزایل لەوەر کارەبا بڕین لە قەلعەت ساڵح لە پارێزگای میسان کردن.. سەرچەوەیگیش لە تەندروسی میسان ئەرا ئاژانس شەفەق نیوز وت: رووداوەیل قەلعەت ساڵح بوینە هووکار کوشیان بە ناڕەزا و زەخمداربوین ٥ کەس تر لەلیان.
وەگورەی چالاکوانەیل، هێزە ئەمنیەیلە ناڕەزایلە لەناو بردن، و وە ناڕەزایەتیەگەی نزیک دوڕیان عەسکەری لە شار بەسرە زوور شیوانن، وتنیش؛ خۆپیشاندەرەیل داوای کارەبا کردن.
