فەرماندەی فەوجەگە پاڵەوانەگەیە.. هووزەیل کورد لە کەرکووک هووشداری لە داگیرکردن دیموگڕافی کەن

شەفەق نیوز/ هووزەیلیگ کورد لە دەورگرد کەرکوک، هووشداری لە کارەیل داگیرکردن وەسوەباننان زەویەیل کشتوکاڵییان کەن، ئەرا مەبەستیەل هەڵبژاردن، و هووشداری کردن لە فیتنەی نەتەوەیی ک توانای گردەوکردنی نەوود.حەسەن محمد ئەندام یەکێتی نیشتمانی کوردستان ئەرا ئاژانس شەفەق نیوز وت: فەرماندەی فەوج ٢٠ لە فیرقەی پەنجەم لە پۆلیس فیدڕاڵی کارەیل تەعریب دیموگڕافی لە بان زەویەیلیگ کەێد ک هووزە کوردەگان خاوەنیانانن لە باشوور خوەرئاوای قەزای داقوق سەروە پارێزگای کەرکوک، هەرچەن ئی زەویەیلە وەفەرمی و یاسایی لە ساڵ ١٩٧٢ هی چوار هووز کوردن.

ئەحمەد دیاریکرد  هووزەیل بونەجم و جەنگلاو و بوسەڕاج داودە زەند بەنی عز لە ساڵ ١٩٧٢ هانەناویان وخاوەنیانن، وەگورەی بەڵگەنامەیل ماڵداری لە مادەی ١١٧ ئەرا ساڵ ١٩٧٠، بەڵکم رژیم وەرین لە ساڵ ١٩٧٤ زەویەگان لە کورد تاڵان کرد ئەرا مەبەستیلیگ دیموگڕافی و لە سیاسەت تەعربب، و دووپاتکرد ک هووزە کوردەگان لە ساڵ ٢٠٠٣ زەوی و ماڵەیل خویان بردنەو وەگورەی گریەبەسەیلیگ فەرمی ئەرا ماوەیل جووراجوریگ رەسنە ٢٠ تا ١٧ ساڵ.

ئەحمەد وتیش؛ هووزە کوردەگان لە دەیان ساڵەو وەگەرد هووزەیلیگ عەرەو ژیان کردنە، و پەیوەندی زاوایی کۆمەڵایەتی قایمیگ دیرن و لەبان گشت رەوشەگانەو برایی دیرن، بەڵکم لایەنەیلیگ هەس پیلانەیل دویرەوخستن نوویگ ئەرا کورد لە زەویەیل خوەیان جیوەجی کەن، وهاوردن عەرەوەیلیگ ک وەفەرمان رژیم وەرین زەویەیل کورد داگیر کردن، ئەرا مەبەستەیل و هەڵمەتەیلیگ هەڵبژاردنی لەلایەن لایەنەیل سیاسی عەرەوەیلیگ.

ودیاریکرد ک ئەو عەرەوەیلە ک هاتنە ولە ماوەیل ١٩٧٤ تا ٢٠٠٣ زەویەیل کورد داگیر کردنە، قەرەبووەیل پویلی لە مادەی ١٤٠ لە دەستور عراق وەرگردنە، وچینەو وەرەو ناوچەیل خوەیان، بەڵکم لایەنەیلیگ سیاسی تەقەلادەن سیناریۆی داگیرکردن دیموگڕافی دووارەو بکەن، و دووارە زاڵەو بوون لەبان هووزە کوردەگان.

وەرپرسە کوردەگە سەرسام بوی لە هاوردنەوەی زیاتر لە ١٠٠ هیزته عەرەو ئەر ا داگیرکردن زیاتر لە ٦٥٠٠ دۆنەم لە زەویەیل هووزە کوردەگان لە لایەن فەرماندەی فەوج ٢٠ لە فیرقەی پەنجم لە پۆلیس فیدڕاڵی، ودەسکرنە جفت زەویەیل کورد و هەنای یەکیگ لە دەمچەرمگیل کورد ناڕەزایی خوەی لەو جفتکردن ناشەرعیە نشاندا، فەرماندەی فەوج ٢٠ لە نوای گشتی دەسدریژی لەلی کرد و سووکایەتی وەپی کرد، ک ئاماژە دەێد وە سەرەتای فیتنەیگ و دوژمەنی نەتەوەییگ توانای گردەوکردنی نیە.