عه‌سايب ئاشكراى فشاره‌يل داگيركارى وه‌زاره‌ته‌يل عه‌لاوى كرد
شه‌فه‌ق نيوز/ فراكسيۆن سادقون له په‌رله‌مان عراقى سه‌ر وه بزووتنه‌وه‌ى عه‌سايب ئه‌هل هه‌ق، ئاشكراى فشاره‌يليگ سياسى كرد له‌بان محه‌مه‌د تۆفيق عه‌لاوى سه‌رۆك وه‌زيره‌يل راسپارياێ، له‌وه‌ر خاتر داگيركردن بڕيگ له وه‌زاره‌ته‌يل حكومه‌ته تازه‌گه‌ێ.
له‌ى باوه‌ته‌و، عه‌بدولئه‌مير ده‌بى ئه‌ندام فراكسيۆنه‌گه ئه‌را شه‌فه‌ق نيوز وت: محه‌مه‌د تۆفيق عه‌لاوى سه‌رۆك وه‌زيره‌يل راسپارياێ جوور كانديد گشتلايگ و كانديد ملله‌ت و هيزه‌يل سياسيه، هه‌ر وه‌و خاتريشه بايه‌سه له هه‌ڵوژاردن وه‌زيره‌يلى دقه‌ت بكاو وه‌زيره‌يل شاره‌زا هه‌ڵوژنێد و تواناى وه‌رپرسيارێتى داشتوون.
ده‌بى هه‌مش وت: سه‌رۆك و ه‌زيره‌يل راسپارياێ هيمان فشار فريه‌يگ ها بانى له‌لايه‌ن بڕيگ له هيزه‌يل سياسى له‌وه‌ر خاتر چه‌سپانن كه‌سه‌يليگ ئه‌را داگيركارى بڕيگ له پۆست وه‌زاره‌ته‌يل له حكومه‌ت تازه‌و داوايش له عه‌لاوى كرد له‌ده‌يشت چوارچيوه‌ى كاريگه‌رى و فشاره‌يل سياسى بدێ و جوور كه‌سايه‌تييگ سه‌روه‌خوه‌ى كار بكا.
