عراق و بەنگلادش دوو دەسمیەت ئەرا وەهێزکردن هاوکاری دیپلۆماسی و سیاسی واژوو کەن
شەفەق نیوز - بغداد
وەزارەت دەرەوەی عراق، ئمڕوو یەکشەممە، راگەیان وەزیر دەیشت عراق فوئاد حسێن وەگەرد هاوتا بەنگلادشیەگەی "همايون كبير" دوو یاداشتنامەی لەیەکفامستن ئەرا وەهێزکردن دەسمیەتی دیپلۆماسی و سیاسی لەناوەین هەردووگ وڵات واژوو کردن.
یەیش لە دیداریگ هات کە، دویەشەو شەممە، هەردووگ وەزیرەگە گردەو کرد، لە پەڕاوێز کارەیل خول پەنجاو دویەم کۆمەڵەی وەزیرەیل دەیشت وڵاتەیل ئەندام لە رێکخریاگ دەسمیەتی ئیسلامی، کە لە بغدای پایتەخت وەڕێوە چوود.
وەزارەت دەیشت عراق دیاریکرد لە وەخت دیدارەگە باس لە پەیوەنییەیل دوولایەنەی لەناوەین هەردووگ وڵات و ریچارەیل وەنوابردن و بەهێزکردن دەسمیەتی لە مژارەیل جیاواز کریا، وە شێوەیگ کە خزمەت وە بەرژەوەنییە هاوبەشەیل بکەێد، بیجگە لە ئاڵشتکردن راوبۆچوین لەبان باوەتەیل خاوەن بایەخ هاوبەش، و دووپاتکردن لەبان گرنگی وەردەوامیدان وە هەماهەنگی و راوێژکاری لەناوەین هەردووگ لایەن.
بەپای بەیاننامەگە، دیدارەگە واژووکردن دوو یاداشتنامەی لەیەکفامستن لەناوەین هەردووگ وڵات وەخوەی دی، یەکەمیان پەیوەنیدارە وە وەخشین هەردووگ لا لە ڤیزای بەشداربوین ئەرا هەڵگرەیل پاسپۆرتەیل دیبلۆماسی و فەرمی، و دویەمیش، پەیوەنیدارە وە دروستکردن میتۆدیگ ئەرا سلاکارەیل سیاسی خولیی لەناوەین وەزارەتەیل دەیشت هەردووگ وڵات.
هەردووگ لا دووپاتکردن لەبان گرنگی یاداشتنامەیل لە ئەوزەڵداین دەسمیەتی دولایەنیەل، و گورجەوکردن کەناڵەیل پەیوەنی و سلاکاریەیل سیاسی، و ئاسانکاری جموجویل هەڵگرەیل پاسپۆرتەیل کە بڕگەی یاداشتنامەی وەخشین گرێدەیانەو ، وە شێوەیگ کە بەشدار بوود لە قویڵکردنەوەی پەیوەنییەیل دیبلۆماسی لەناوەین کۆمار عراق و کۆمار بەنگلادش میللی، و وازکردن ئاسۆیل فراوان ئەرا دەسمیەتی هاوبەش.
