کەشوهەوا: دەرفەت ئەرا وارین واران بەڵاچەدار لە شوونەیل جیاجیا لە عراق

شەفەق نیوز - بەغداد

دەسەی گشتی کەشوهەوا و  زەویلەرزەناسی، ئمڕوو پەنجشەممە، مەزەنەی وارین واران بەڵاچەدار کرد لە شوونەیل جیاجیا و وە دیاریکریاگ لە ناوچەی ناوڕاس، لە وەختیگ ناوچەی باکوور کەشوهەوایگ ساماڵ وەگەرد بڕیگ ئەور دوینێد کە کەم‌کەم ئاڵشت بوود ئەرا نیمچەئەوری، وەگەرد دەرفەت ئەرا وارین واران سووک لە شوونەیل جیاجیا.

دەسەگە لە راپۆرتیگ کە ئاژانس شەفەق نیوز ئاگاداری بوی دیار کرد  پلەیل گەرمی کەمیگ بەرزەوبوین وە بەراورد وە دویەکە لە هەردوگ ناوچەی ناوڕاس و باشوور، لە وەختیگ چەن پلەیگ بەرزەو بوود لە ناوچەی باکوور، تا کەشوهەوا پایزیی مامناوەن تا گەرم بوود لە وەخت رووژ.

راپۆرتەگە دیاریکرد، واگەی باکووری خوەرئاوا بوود وە تیژی سووک تا ناوڕاس گاجاریگ کپبوین و ئاڵشتکاری کەفێدە ناوی لە ناوچەی باکوور.

بەسرە بەرزترین پلەی گەرمی توومار کرد وە 42 پلەی سەدی، و دویای ئەو میسان و ذی قار وە 41 پلە، و موسەنا وە 40 پلە، لە وەختیگ پەی گەرمی رەسیە 39 پلە لە واسیت، و 38 لە دیوانیە.

نەجەف  36 پلە توومار کرد، لە وەختیگ رەسیە 35 پلە لە دیالە و کەربەلای پیرۆز و بابل، و 34 پلە لە بەغداد و سەڵاحەدین.

پلەیل گەرمی رەسیە 33 پلەی سەدی لە کەرکوک و ئەنبار، و 32 لە نەینەوا، لە وەختیگ هەولێر 31 پلە توومار کرد، و دهۆک 30 پلە، و سلێمانی 29 پلە.

کەشوهەواناس سادق عەتیە، دویەکە چوارشەممە، مەزەنەی وارین واران وە شێوەی سووک و بەڵاچەدار کرد کە لە    شوونەیل جیاجیا لە شارەیل ناوڕاس وڵاتەگە بوود، و ئیوارەی پەنجشەممە وارینەیل جیاجیا وەردەوام بوود لە باکوور وڵاتەگە و هەرێم کوردستان.