شاند حکومەت هەرێم کوردستان وەگەرد پارتی دیموکرات گردەو بوود و ناکۆکییەیل هەولێر و بەغداد کەفنە سەرەتای قسەوباسەیل
شەفەق نیوز - هەولێر
شاند دانوسەنکار حکومەت هەرێم کوردستان وەگەرد حکومەت فیدراڵی، ئمڕوو شەممە، وەگەرد سەرکردایەتی پارت دیموکرات کوردستان لە بارەگای سەرەکی ئەرا مەکتەب سیاسی پارتەگە لە شارۆچکەی سەڵاحەدین (پیرمام) گردەو بوی.
وەپای پەیامنێر ئاژانس شەفەق نیوز، دیدارەگە باس پرسە هەڵواسیاگەیل ناوەین حکومەت هەرێم کوردستان و حکومەت فیدراڵی کرد، و شاندەگە ئاگادار هەڵوێست پارتی دیموکرات کوردستان و دیدی بۊ لەباوەت ئەو دۆسیەیلە کە جی ناکۆکین لەناوەین هەولێر و بەغداد.
ئی گردەوبوینە لە چوارچیوەی راوێژکارییەیل تیەێد لەباوەت دۆسیە هەڵواسیاگەیل ناوەین حکومەت هەرێم کوردستان و حکومەت فیدراڵی.
ئی دیدارە هاوەختە وەگەرد راگەیانن حکومەت هەرێم کوردستان لە پەنجشەممەی گوزەشتە، کە شاندە باڵا دانوسەنکارەگەی سەردانیگ ئەرا بەغداد کردگە ئەوەیش وە ئامانج بەشداریکردن لە قۆناغ ئامادەکردن و داڕشتن رەشنووس پرۆژەی یاسای بودجەی فیدراڵی ئەرا ساڵ 2027، و چەسپانن بەش و شایستە دەستووری و داراییەیل هەرێم کوردستان.
