سزای 15 ساڵ وەبان تومەتباریگ بەشداری لە رفانن رووژنامەنویسیگ ئەمریکی لە بەغداد کردگە

شەفەق نیوز- بەغداد

سەرچەوەیگ ئاگادار، رووژ دۊشەممە، خەوەردا لە دەرچگن بڕیار زیندانیکردن 15 ساڵ لەبان یەکیگ لە بەشداربۊیل لە رفانن رووژنامەنویسیگ ئەمریکی لە بەغداد.

سەرچەوەگە ئەرا ئاژانس شەفەق نیوز وت، کە "بڕیارەگە لە دادگای تاوانەیل ناوەندی لە بەغداد/ رەسافە، لەبان تومەتبار ئەمیر رەحیم جەبار لازم دەرچگە، وەپای یاسای دژەتیرۆر، لەوەر تاوانبارکردنی وە بەشداریکردن لە رفانن ژنە رووژنامەنویس ئەمریکی شێلی کیتڵسۆن".

کیتڵسۆن، کە رووژنامەنویسیگ سەروەخوەیە و لە رۆما نیشتەجیە و کار وەگەرد شمارەیگ لە دامەزراوەیل راگەیانن ئەمریکی و ئەوروپی کەێد، لە 31 ئازار گوزەشتە لە بەغداد رفیا.

کەتیبەیل حزبولڵا دۊاتر راگەیانن، کە ئازادیان کردگە وە "رێزگردن" ئەرا هەڵوێستەیل سەرۆک وەزیرەیل عراقی، وە مەرج ئەوەگ دەسوەجێ عراق وەجی بیلێد، لە وەختیگ وەرپرسەیل ئەمنی ئەرا ئاژانس شەفەق نیوز وتن، کە دەسەڵاتەیل عراقی کیتڵسۆن وەرگردنە و کار لەبان رێکارەیل دەرچگنی لە وڵاتەگە کەن.