پزیشکەیل تەمەی وە خوەراکیگ سووک کردنە.. "بڕیگ فرە لە کەواو چەور" کووتایی وە ژیان بیماریگ لە عراق تیارێد
شەفەق نیوز- سەڵاحەدین
وەڕێوەبەرایەتی خەسەخانەی دووز گشتی لە پارێزگای سەڵاحەدین، ئمڕوو دوشەممە، هۊردەکاریەیل گیانلەدەسداین بیماریگ تەمەن 44 ساڵان ئاشکرا کرد، دۊای ئەنجامداین نەشتەرگەرییگ لەناو خەسەخانەگە، و دیاری کرد کە رەوش تەندروسیی وەناکاو خراوەو بۊ دۊای خواردن بڕیگ فرە لە کەواو.
وەڕێوەبەرایەتی خەسەخانەگە لە دیاریکردنیگ کە رەسیە ئاژانس شەفەق نیوز وت، کە بیمارەگە ناڵنیاد وەدەس بیمارییگ کە هەوەجەی دەسوەردانیگ نەشتەرگەری داشت، و دۊای وەشکینە پزیشکییە داواکریاگەیل، نەشتەرگەریەگە ئەرای ئەنجام دریا لە هۆڵ نەشتەرگەرییەیل خەسەخانەی دووز گشتی.
هەمیش وت کە "نەشتەرگەریەگە وە سەرکەفتنی ئەنجام دریا، و بیمارەگە لە هۆڵ نەشتەرگەرییەیلەو دەرچگ و هووشی وە تەواوی وەخوەی بۊ، و چگە ئەرا یەکیگ لە هۆڵەیل خەسەخانەگە ئەرا وەرگردن چارەسەر و چەودیاری دۊای نەشتەرگەریەگە".
دیاری کرد کە پزیشک نەشتەرگەر پسپۆڕ دەرمانەیل دژە هەوکردن و ئارامکەر ئەرا ژان نۊسیاد ئەرا نەخوەشەگە، و دیاری کرد کە کەسوکارەیل بیمارەگە تەمەیل پزیشکی وەردگردۊن وە پیشکەشکردن ژەمە سووکەیلیگ لە شلە و خوەراکە سادەیل دۊای نەشتەرگەریەگە.
وەڕێوەبەرایەتیەگە هەمیش وت کە کەسوکارەیل بیمارەگە لە بازاڕ ناوخۆیی ژەمیگ کەواو ئەرای هاوردن، کە بڕیگ فرە لەلی خوارد، وەرجە ئەوەگ تۊش ژانەیل ناکاوی لە زگ و ئەڵاوردن و خراوەوبۊن زویوەزوی لە رەوش تەندروسیی بوود.
دیاری کرد کە ستاف پزیشکی وە شیوەیگ پەلە دەسوەردان کردن، وە بەشداری پزیشک نەشتەرگەر کە نەشتەرگەریەگەی ئەنجام داۊد و پزیشک بیهووشکەر سەرپەرشتیار لەبانی، وەگەرد تیم پزیشکی لە هۆڵ نەشتەرگەری و هۆڵ فریاکەفتن، وەلی تەقەلایەیل رزگارکردنی سەرنەکەفتن، و گیانلەدەسداینی راگەیانیا.
وەڕێوەبەرایەتی خەسەخانەگە دیاری کرد کە گومانیگ سەرەتایی هەس وە رۊداین جەڵتەی دڵ ناکاوی، و دووپات کرد کە مدوو گیانلەدەسداین کووتایی هێمان تا ئیسە یەکلا نەۊەسەو، و تەرم مردگەکە کلکریاس ئەرا بەش پزیشک دادوەری لە کەرکوک ئەرا ئەنجامداین وەشکینەیل و دیاریکردن مدوو گیانلەدەسداینەگە وە شیوەیگ فەرمی.
وەڕێوەبەرایەتیەگە راسبۊن ئەو چشتەیلە رەت کرد کە بڕیگ لە پەڕەیل پەیوەندی کۆمەڵایەتی و ئامرازەیل راگەیانن بڵاویان کردنە لەباوەت داین دەرمانەیل دیاریکریاگ وە نەخوەشەگە کە بۊەسە مدوو گیانلەدەسداینی، و دووپات کرد کە ئەو رێکارە پزیشکییەیلە کە گیریانەسە وەر لە وەخت چگنی ئەرا خەسەخانە تا خراوەوبۊن رەوشی "رێکارەیل پزیشکی فەرمی و بیوەی" بۊنە.
