زیاتر لە 1.7 ملیۆن خوەنەوار ساڵ نوو خوەنینیان لە هەرێم کوردستان دەس پێ کەن
شەفەق نیوز ـ هەولێر
حکومەت هەرێم کوردستان، ئمڕوو شەممە، تەواوبۊن ئامادەکارییەیل ئەرا دەسوەپێکردن ساڵ نوو خوەنین 2026-2027، ئەرا سوو رووژ یەکشەممە راگەیاند، وە بەشداریکردن زیاتر لە ملیۆنیگ و 750 هەزار خوەنەوار.
فەرمانگەی راگەیانن و زانیاری لە حکومەت هەرێم، لە راپۆرتیگ کە رەسیە ئاژانس شەفەق نیوز وت، زیاتر لە 123 هەزار خوەنەوار چگنە پۆل یەکەم سەرەتایی، لە وەختیگ شمارەی مەکتەوەیل رەسێدە زیاتر لە 7590 مەکتەو
دیارییکرد، حکومەت هەرێم 236 مەکتەو و باخچەی زاروویەل نوو لە پارێزگاگەیل و یەکە ئیداریەیل جیاواز دروس کردیە، لە شان زیایەکردن 476 پۆل خوەنین لەناو ئەو مەکتەبەیلە کە هەبوین، و نووەوکردن 2650 مەکتەو.
لەبارەی پڕۆگرامەیل خوەنین، راپۆرتەگە دیاری کرد کە 110 کتاو مەکتەو ئەرا قۆناغەیل جیاواز دەستکاری کریاگە تا بپورێد وەرد پیشکەفتنەیل زانستی و هەوەجەیل پەروەردەیی، بیجگە چاپکردن نزیکەی 20 ملیۆن کتاو نوو و بەشەوکردنیان لەبان مەکتەوەیل شارەیل و ناحیەیل و دەهاتەیل وەپای شمارەی خوەنەوارەیل و هەوەجەیلیان.
وەپای راپۆرتەگە، شمارەی کادیرەیل کارکەر لە مەکتەوەیل هەرێم وەسێدە 168 هەزار و 735 کەس، لەناویانیش 107 هەزار و 426 مامۆستا لەبان میلاک هەمیشەیی، و 30 هەزار و 90 مامۆستای گرێبەست، لە شان 31 هەزار و 219 فەرمانبەر.
لە ئاست فێرکاری بەرز، 16 زانکۆی حکومی و 18 زانکۆی تایبەت دەوام خوەیان لە سەرەتای ئی مانگ ئەیلوولە دەسوە پێکردنە، لە وەختیگ کووی شمارەی خوەنەوارەیلیان رەسیەسە 186 هەزار و 400 خوەنەوار، وە رێژەی 145 هەزار و 513 خوەنەوار لە زانکۆ حکومیەیل، و 40 هەزار و 887 خوەنەوار لە زانکۆ تایبەتەیل.
