رووژیگ وەبی مردن.. تەندروسی هەرێم ٢٣٧ تووشهاتن وە کۆڕۆنا تۆمار کەێد

شەفەق نیوز/ وەزارت تەندروسی لە هەرێم کوردستان، ئمڕوو یەکشەممە، ٢٣٧ تووشهاتن نوو وە ڤایڕۆس کۆڕۆنا لە گشت شارەیل هەرێم تۆمار کرد.

وەزارەتەگە لەبەیانامەیگ رەسیە ئاژانس شەفەق نیوز: فەرمانگەیل تەندروسی لە هەرێم ٢٣٧ تووشهاتن نوو تۆمار کردن.

بەیاننامەگە وتیش؛ تووشهاتنە نووەگان وەیجوورە بەشەوە بوین: ١٣٥ هەولێر، ٦٨ سلێمانی، ٢١ دهۆک١٢ گەرمیان، ٢ راپەڕین.

وەگورەی بەیاننامەگە، ٨٣ کەس لە پەتاگە خاسەو بوینە، وەیجوورە: ٢١ هەولێر، ٣٢ سلێمانی، ٢٥ دهۆک، ١ هەڵەبجە، ٤ گەرمیان.

خەسەخانەیل هەرێم، هیچ مردنیگ لەوەر ڤایڕۆس کۆڕۆنا لەماوەی دویاترین ٢٤ ساعەت تۆمار نەکردن.

وەیەوە گشت ژمارەی تووشهاتنەگان لە هەرێم کوردستان رەسێدە ١٠٨٩٥٤، و گشت ژمارەی خاسەوبویەگان رەسیە ١٠٣٥١٤، و ژمارەی مردنەگان لەپای ٣٥١٩ مەن.