رونکردنیگ لە بەغداد لەبان ئازادکردن "تیرۆریستەیل" لە زیندانەیل کوردستان و گواستنەوەیان ئەرا کەرکوک
شەفەق نیوز - بەغداد
شانەی راگەیانن ئەمنی، ئمڕوو دوشەممە، بەیاننامەیگ لەبان زانیارییەیل ئازادکردن تیرۆریستەیل لە کوردستان و گوواستنەوەیان ئەرا کەرکوک دەرکرد.
شانەگە لە بەیاننامەیگ رەسیە ئاژانس شەفەق نیوز وت: "شانەی راگەیان ئەمنی لە نویسینگەی فەرماندەیی گشتی هێزەیل چەکدار، وەدویاچگن ئەرا ئەو باوەتەیلە کرد کە بەشیگ لە راگەیانن و پلاتفۆرمەیل تووڕە کۆمەڵایەتییەیل بڵاوی کردوین لەبا لەبان لێدوانیگ کە پەیوەست کریاوێد وە سیاسییگ، گوایە شمارەیگ فرە لە کەسەیل پۆلێنکریاگ جویر تیرۆریست لە بەشیگ لە زیندانەیل هەولێر و دهۆک ئازادکریانە و وەرەو پارێزگای کەرکوک گواستیانە".
وتیش؛ "لەو بارەو شانەگە دووپاتکرد ئەوەگ لەو لێدوانەیلە هاتگە، وەپای زانیارییە فەرمییە وەردەسەیل، پشت نەوەسیە وە بەیاننامە یا هەڵوێستیگ کە وەلایەن لایەنەیل ئەمنییە تایبەتمەنەیل عراقی دەرچوود، و تا ئیسەش هویچ چشتیگ دووپات نەویە راسی ئیە بچەسپنەێد".
دووپات کرد "دەزگا ئەمنی و هەواڵگرییە تایبەتمەنەیل وەردەوامی چەودێری گشت چشتیگ کەن کە پەیوەنی وە هەرەشەیل تیرۆریستی و جویلەی ئامانجە داواکریاگەیل کەن، و زانیارییە ئەمنییەیل وەرجە پەسەنکردن یا راگەیاندنیان رویوەروی دۊزەوکردن و ساغکردن لە سەرچەوەیلیان بوون".
وتیش؛ "هێزەیل ئەمنی وە جویرەیل و پێکهاتەیل جیاجیایان وەردەوامن لە ئەنجامدان ئەرکەیلیان لە شوونکەفتن وەجیماگەیل رێکخریاگەیل تیرۆریستی و وەرگیری لە هەر چالاکییگ کە هەرەشە لە ئەمنییەت هاووڵاتییەیل بکەێد، و لە ئاستیگ بەرز لە ئامادەیی و هووشیارین ئەرا مامەڵەکردن وەگەرد هەر هەرەشەیگ پوڕیاگ".
