روانگەیەل عراقی دەیان زەویلەرزە لە کەرکوک لە ماوەی 4 رووژ توومار کەن

شەفەق نیوز- بەغداد

دەسەی گشتی کەشناسی و روانگەی زەویلەرزەیی عراقی، ئمڕوو دوشەممە، راپۆرتیگ هۊرد لەباوەت چالاکی زەویلەرزەیی دەرکرد کە ئەو ناوچەیلە وەخوەیان دینە کە کەفنە خوەرهەڵات و باشوور خوەرهەڵات پارێزگای کەرکوک، لە ماوەی 30 تەمموز گوزەشتە تا 2 ئاب ئیسە.

راپۆرت بەش روانگەی زەویلەرزەیی لە دەسەگە، لە بەیاننامەیگ کە رەسیە ئاژانس شەفەق نیوز، دیاری کرد، کە زنجیرەیگ لە زەویلەرزەیل لە ناوچەگە دا، کە چالاکییەگە مەوقەی سەعات 00:51:45 وە وەخت ناوخۆیی شار بەغداد رووژ پەنجشەممە 30 تەمموز دەسوەپی کرد، لە وەختیگ هاز زەویلەرزە سەرەکییەگە رەسیە 4.5 پلە لەبان پەیمانەی رێختەر.

 دیاری کرد کە رووژ شەممەی یەکەم لە ئاب ئیسە، لە دۊری نزیکەی 23 کم خوەرهەڵات شار کەرکوک توومار کریاس، هەمیش وت کە چالاکییەگە ئەرا ماوەی چوار رووژ لە 30 تەمموز تا دوو ئی مانگە وەردەوام بۊ، و وەرجە زەویلەرزە سەرەکییەگە نزیکەی 30 لەرزەی وەرجەخت رۊ دان، لە وەختیگ 15 تەکان لەرزە وە دۊای هاتن.

راپۆرتەگە دەسنشان ئەرا توومارکردن چالاکی 46 زەویلەرزە کرد، کە هازیان ناوەین 1.1 و 4.9 پلە بۊ، و ریژەی گەوراتر لەلیان لە لەرزە لاوازەیل بۊن کە ئامێرەیل روانگە هەس وەپی نیەکەن مەگەر لە شوینەیل دیاریکریاگ، لە وەختیگ هاز شمارەیگ لە لەرزەیل ناوەین 2 و 3 پلە بۊ، هەرلیوا لەرزەیل وە هازەیل بەرزتریش توومار کریان.

 دووپات کرد کە دانیشتگەیل ئەو ناوچەیلە کە نزیکن لە سەنتەرەیل رووکاری ئەرا لەرزەیلە ئاگا لە هازەیل جیاواز داشتنە، و کاریگەری بڕیگیان دریژەو بۊ ئەرا ناوچەیل لە پارێزگای کەرکوک و بەشەیلیگ لە هەرێم کوردستان.

 لەباوەت رەوش زەویلەرزەیی لە ناوچەگە بەش روانگەی زەویلەرزەیی دیاری کرد، کە ناوچەگە کەفێدە ناو بەش باکوور خوەرهەڵات لە پارچەی عەرەبی، کە یەکیگە لە ناوچەیل گورج لەڕۊ زەویلەرزەیی، چۊنکە ناوچەی چالاکی لە باکوور و باکوور خوەرهەڵات وڵاتەگە تا رەسێدە بەسرە دریژەو بوود، وەشان سنوورەیل عراقی وەگەرد ئیران و تورکیا، و وە قۊلییگ کە رەسێدە نزیکەی 130 کیلۆمەتر.

 وەردەوام بۊ کە ئی پشتینە جیابوودەو وە چالاکییگ زەویلەرزەیی ئاشکرا لەڕۊ شمارەی رۊداوە زەویلەرزەییەیل و هازەیلیان، و کووتایی تیەێد وەرەو ناوچەی کەنار ئارام، لە وەختیگ ناوچەی خوەرهەڵات و باکوور خوەرهەڵات لە عراق بەشیگە لە پشتینەی چالاکی زەویلەرزەیی گریەدریاگ وە جۊلەی تێکتۆنی لە ناوچەگە.

دەسنشان کرد ئەرا ئەوەگ چەوەخشانن توومار زەویلەرزەیی نوو ئەرا ناوچەگە و ناوچەیل هاوسای ئەرا ئەو ماوە کە لە 1900 تا 2026 دریژەو بوود کە وەرەوڕۊ نزیکەی 154 زەویلەرزە بۊە، کە هازیان ناوەین 1 و 5.2 پلە بۊ، ئەوەگ دووپات وەردەوامبۊن چالاکی زەویلەرزەیی لەی ناوچە کەێد لەڕی ماوەیل جیاواز.

و لەباوەت مدووەیل چالاکی زەویلەرزەیی، دیاری کرد کە عراق وە یەکیگ لەو وڵاتەیلە هەژمار کریەێد کە وەرەوڕۊ چالاکی زەویلەرزەیین وەپای شوین جیۆلۆجیی، چۊنکە کەفێدە ناو ناوچەی کارلیک ناونی پارچەی عەرەبی و پارچەی ئۆراسی هەرلیوا جۊلەی وەردەوام ئەرا پارچەی عەرەبی وەرەو باکوور خوەرهەڵات کەێدە مدوو کەڵەکەبۊن فشارەیل لە ناوچەیل ویەککەفتن تێکتۆنی، وە تایبەت لەناو پشتینەی کویەیل زاگرۆس و مەکران، ئەوەگ لەلییەو چالاکی زەویلەرزەیی جیاواز لە ناوچەگە دەرتیەێد.

 راپۆرتەگە دەسنشان ئەرا ئەوە کرد کە فراوانی رووبەر بەشەیل باکوور و خوەرهەڵات لە پارچەی عەرەبی، لەشان وەردەوامبۊن جۊلەی پارچەیل و زەنگە گورجەیل، بەشداری لە وەردەوامبۊن چالاکی زەویلەرزەیی لەو ناوچەیلە کەێد کە کەفنە ناو پشتینەی یەکانگیری هەردوگ پارچەگە.

 بەش روانگەی زەویلەرزەیی دووپات کرد کە کادرەیل پسپۆڕ وەردەوامن لە وەدۊاچگن و شیەوکردن چالاکی زەویلەرزەیی لە ناوچەگە وە شیوەیگ وەردەوام، لەڕی توڕ روانگەی زەویلەرزەیی عراقی، وەگەرد چەودیاریکردن هەر پیشکەفتنەیل یا لەرزەیل نوویگ.

 ئی وەدۊاچگنە لەناو ئەرکەیل دەسەگە تیەێد ئەرا روانگەی چالاکی زەویلەرزەیی لە گشت وڵاتەگە، و شیەوکردن داتایەیل هاتگ لە وێستگەیل روانگە لە وڵاتەگە و ئامادەکردن راپۆرتە زانستییەیل، وە جۊریگ گەرەنتی دابینکردن زانیارییە فەرمییە ورد و باوەڕپیکریاگەیل ئەرا لایەنە پەیوەندیدارەیل و میدیایەیل راگەیانن و هاووڵاتییەیل بیەێد.