پەرلەمانتاریگ لە دیالە باس گلەوخواردن ژیان ئەرا دەریاچەی حەمرین کەێد

شەفەق نیوز/ سەڵاح زەینی پەرلەمانتار لە دیالە، ئمڕوو شەممە، دووپات کرد ک ژیان وەپلەپلە دەسکردە گلەوخواردن ئەرا دەریاچەی حەمرین، ک گەورەترین ئەمار ئاویە لە پارێزگاگە، دویای نەهامەتی هشکەساڵیەگە.  

زەینی ئەرا ئاژانس شەفەق نیوز وت: تەکانەیل ئاوەگە ک وەگەرەی رێککەفتن دیالە سەگەفد یەکەی گەرمیان  لە بەنداوە دەربەندیخان ئەرا دەریاچەی حەمرین تیەن، رەسیە ٥٠ مەتر شەشپاڵو لە یەک چرکە، و ئاست دەریاچەگە هالە بەرزەوبوین ئەرا دابینکردن ئاو نووشین ناوچەیل فراوانیگ لە دیالە. 

وتیش: زیایبوین ئاست ئاو لە دەریاچەی حەمرین دویای یەک ساڵ ونیم لە هشکەساڵی،  رزگارکردنە ئەرا چەن یەکەیگ ئیداری لە تینی وهشکی، و دووپات کرد ک باوەت دەریاچەی حەمرین لەلای گشتی خاوەن پاڵپشتی وچەودیریە ئەرا گلەوداین ژیان وە گەورەترین دەمار ئاوی لە دیالە.