رفانن 123 خوه‌ينيشانده‌ر.. نه‌ته‌وه‌يل يه‌كگرتگ باس مه‌ينه‌تيه‌يليان كرد و ئه‌مانه‌تيان دا كازمى

رفانن 123 خوه‌ينيشانده‌ر.. نه‌ته‌وه‌يل يه‌كگرتگ باس مه‌ينه‌تيه‌يليان كرد و ئه‌مانه‌تيان دا كازمى
2020-05-23T10:32:43+00:00

شه‌فه‌ق نيوز/ نێرده‌ى نه‌ته‌وه‌يل يه‌كگرتگ له‌ عراق، ئاشكراى ئه‌وه‌ كرد ك مه‌ينه‌تى خوه‌ينشانده‌ره‌يل رفياێ وه‌پى ره‌سيه‌و ئاماژه‌يش وه‌ رفيان 123 خوه‌ينشانده‌ر كرد ك تائيسه‌ 98 له‌ليان دوينريانه‌سه‌و، داوايش له‌ حكومه‌ت مسته‌فا كازمى كرد هه‌وڵ گورجيگ بيه‌ێد و پابه‌ند بدێ وه‌و قه‌وڵه‌يله‌ داسه‌ى وه‌رانوه‌ر وه‌ چالاكوانه‌يل بى سه‌رووشوون و ئاشكراى ناسنامه‌ى ئه‌و هيز و لايه‌نه‌يله‌ بكا ك وه‌رپرسن له‌بان حاڵه‌ته‌يل رفانن.

نێرده‌ى نه‌ته‌وه‌يل يه‌كگرتگ له‌ به‌ياننامه‌يگ ك روينويسيگى ره‌سيه‌ ئاژاس شه‌فه‌ق نيوز وت: راپۆرت نه‌ته‌وه‌يل يه‌كگرتگ ك ئمڕوو بڵاوكرياو په‌يوه‌سه‌ وه‌ رفانن خوه‌نيشانده‌ره‌يل له‌ عراق له‌ كووتايه‌يل ته‌شرين يه‌كه‌م/ ئوكتۆبه‌ر، باس مه‌ينه‌تيه‌يل ئه‌و خوه‌ينيشانده‌ره‌يله‌ ها له‌تى له‌ وه‌ختيگه‌و رفيانه‌ تا وه‌ختيگ ره‌سينه‌سه‌ حاڵه‌ته‌يل سزاداين.

به‌ياننامه‌گه‌ يه‌يش ده‌رخست ك نويسينگه‌ى مافه‌يل ئاده‌ميزاد له‌ نێرده‌ى نه‌ته‌وه‌يل يه‌كگرتگ ئه‌را ده‌سميه‌ت عراق(يۆنامى)، له‌ راپۆرت چواره‌مى له‌باره‌ى خوه‌ينيشانداين، باس له‌ 123 حاڵه‌ت رفياگ كردگه‌ له‌ناونى ماوه‌ى 1 ته‌شرين يه‌كه‌م/ ئوكتۆبه‌ر و 21 ئادار/ مارس 2020، ك له‌و شماره‌ 98 له‌ليان دوينريانه‌سه‌و، وه‌لێ هيمان 25 كه‌س تر له‌ليان ناديارن.

Shafaq Live
Shafaq Live