راوێژکار کازمی ئاشکرای تەنیا لایەنیگ کەێد ک توانای ئاڵشتکرن مەوقەی هەڵبژاردنەگە دیرێد
شەفەق نیوز/ عەبدولحسێن هنداوی، راوێژکار موستەفا کازمی سەرۆک وەزیران عراق ئەرا باوەتەیل هەڵبژاردن، ئمڕوو شەممە، ئاشکرای ئەو تەنیا لایەنە کرد ک توانای ئاڵشتکردن مەوقەی هەڵبژاردنە زوینەگە دیرێد.
هنداوی ئەرا ئاژانس شەفەق نیوز وت: میکانزمیگ ئەرا دیاریکردن رووژ هەڵبژاردنەگە وەشیوەیگ فەرمی هەس، لە ری هەماهەنگی لەناوبەین ئەنجومەن وەزیران و ئەنجومەن کۆمسیۆنەگان بوود، و دویای دیاریکردن رووژ هەڵبژاردن، لەلایەن سەرۆک کۆمار وەشیوەیگ فەرمی راگەیاننی کریەێد.
هنداوی دووپات کرد ک دیاریکردن رووژ هەڵبژاردنەگە لە دەسەڵات ئەنجومەن وەزیران و ئەنجومەن کۆمسیۆنەگانە، وەهەماهەنگی لەناوبەین هەردوگ لاگە.
و دیاری کرد ک حکومەت موستەفا کازمی وەشیوی روونیگ راگەیان ئەو مەوقە ک خوازێد لەناوی هەڵبژاردن زوینەگە ئەنجام بیەێد، و خوەی رکدارە لەبان ئی مەوقە، و گشت پشتگیریکردنیگ لە گشت چینەگان داگە کۆمسیۆن هەڵبژاردنەگە، وەتایبەت ک ئەرک ئەنجامدان هەڵبژاردنەگە ئەرک کۆمسیۆن هەڵبژاردنەگانە، و ئیمە گشت پشتگیرییگ ئەرا سەرکەفتن ئەرکەگەی کردیمنە.
