ئەرا دویەم رووژ.. بوون گەن و پیسبوین بار هەوای بەغدا سەنگین کەێد
شەفەق نیوز ـ بەغدا
داواکارییەیل دانشتگەیل ناوچەیل لە بەغدای پایتەخت، ئمروو سێشەممە، لە پیسبوین هەوا ئەرا دوویەم روژ لە شوون یەک نووەوبوی، لە ناو بوون گەنیگ کە وتن سەرچەوەگەی لە سزیان گناڵخەیلە لە شوێنەیل نزیک لە کویچەیل نیشتەجیبوون، لە وەختیگ داواکارییەیل ئەرا دەسوەردان لایەنەیل پەیوەندیدار ئەرا کەمکردن پیسبوین بەرزەو بوی.
دانشتگەیل ناوچەیل باشوور پایتەخت وە ئاژانس شەفەق نیوز وتن، ئەوان ئەرا دویەم رووژ وەبان بوون گەنیگ تێکەڵا وە بوونیگ جویر گۆگرد هەڵسیانە، دیاریکرد بەرزەوبوین پلەی گەرمی کاریگەری پیسبوین وەبان کەشوهەوا توندتر کردیە.
شمارەیگ لە دانیشتگەیل دیاری کردن سەرچەوەی پیسبوینەکە گلەوخوەد ئەرا سزانن گناڵخە لە ناوچەی نەهرەوان و شوینەیل نزیک لە سەربازگەی رەشید، لە وەختیگ کاریگەری بوونەیلە درویژەوبوود ئەرا ناوچەیل نیشتەجیبوون ترەک.
لە شارۆچکەی نیشتەجیبوین بەسمایە دانیشتگەیل لە ری تووڕەیل کۆمەڵایەتی داوا لە وەزیر ژینگە و لایەنەیل پەیوەندیدار کردن وە دەسوەردان ئەرا وسانن دیاردەی پیسبوونەگە، وەتایبەت وەگەرد بڵاوبوین بوونەیلە لە ناوچەیل نیشتەجیبوون.
ئی دادەیلە لە سای ئاگادارکردن و رێکارەیل گوزەشتە لەبان پیسبوین لە پایتەخت تێد، چوینکە دەسەی دەسپاکی فیدڕاڵی لە گوزەشتە هەشت گام دیاری کرد ئەرا خاسترکردن جویری هەوا لە بەغدا، لەناویان سزادان شوین سزاننەیل گناڵخە ناڕێکخریاگ، و ناچارکردن لایەنەیل پەیوەندیدار وە دانان و چاککردن سیستەمەیل فلتەرکردن.
لە ساڵ گوزەشتە،بەغدای پایتەخت عراق پلەی دوویەم لە ئاست جەهان داگیر کرد لە لیست پیسترین شارەیل لە رووی هەواو، وەپای زانیارییەیل پلاتفۆرم IQAirی سویسری کە تایبەتە وە چەودێریکردن جویر هەوا.
