کەرکوک.. بەرزەوبوین قوربانیەیل پەلامارەگەی داعش لەبان پۆلیس فیدڕاڵی
شەفەق نیوز/ سەرچەوەیگ ئەمنی، ئمڕوو یەکشەممە، خەوەردا لە بەرزەوبوین ئامار پەلامارەگەی ریخریاگ داعش لەبان پۆلیس فیدڕاڵی لە پارێزگای کەرکوک ئەرا ١٢ قوربانی.
سەرچەوەگە ئەرا ئاژانس شەفەق نیوز وت: پەلامارەگەی داعش لەبان لیوای ١٩ فەوج ٢ لە پۆلیس فیدڕاڵی لە ئاوای تەل ستیح سەروە ناحیەی رەشاد لە کەرکوک رەسیە ١٢ قوربانی، و باس زەخمداری سێ ئەندام تر کرد.
وەرجەیە، سەرچەوەیگ ئەمنی وەرپرس، ئمڕوو یەکشەممە، خەوەردا لە کەفتن قوربانیەیل و زەخمدارەیلیگ لە هێزەیل پۆلیس فیدڕاڵی وە پەلاماریگ لەلایەن ریخریاگ داعش لە باشوور خوەرائاوای کەرکوک.
سەرچەوەگە ئەرا ئاژانس شەفەق نیوز وت: ئەندامەیل ریخریاگ داعش پەلامار لیوای ١٩ لە پۆلیس فیدڕاڵی لە ئاوای تەل ستیح سەروە ناحیەی رەشاد لە کەرکوک دان.
وەگورەی سەرچەوەگە؛ هەفت ئەندام لە پۆلیس فیدڕاڵی بوینە قوربانی و چەن کەسیگ تر لەلیان زەخمدار بوی.
سەرچەوەگە دیاری کرد ک ریەگە وەرەو ئەو ئاوایە وەگشتی بومب دانریاگە و هێزەیل پاڵپشتی بان زەوی توانای رەسین وەرەو لایان نەیرن.
