رەدکردن لە 10 هەزار بەرمیل رووژانە.. بازداینیگ لە بەرهەمهاردن نەفت خاو لە کێڵگەی "نوور" لە میسان
شەفەق نیوز - میسان
وەڕێوەبەر گشتی کۆمپانیای نەفت میسان، حسێن کازم لعێبی، ئمڕوو یەکشەممە، راگەیان وە وەدەسهاوردن بازداینیگ چوينایەتی لە رێژەیل بەرهەمهاردن نەفت خاو لە وێستگەی جیاوەکردن غاز نوور نەفتی تا رەد بکەێد لە 10 هەزار بەرمیل رووژانە.
لعێبی لە بەیاننامەیگ کە رەسیە ئاژانس شەفەق نیوز، دیاری کرد کە ئی زیایبۊنە وە شارەزاییەیل ستافە نیشتمانییەیل وەدەس هاتیە، لە چوارچیوەی پلانە ستراتیژییەیل وەزارەت نەفت کە ئامانجی بەرزەوکردن بەرهەمهاردن نیشتمانی و پاڵپشتییکردن ئابووری عراقییە.
ئاشکرا کرد کە پرۆسەیل بەرهەمهاردن لە وێستگەگە بەرزەوبۊنیگ وەرچەو وەخوەی دیە، کە توانای بەرهەمهاردن ئیسەی رەسیەسە 10 هەزار و 373 بەرمیل رووژانە، دۊای ئەوەگ لە گوزەشتە 9 هەزار و 291 بەرمیل رووژانە توومار کردۊد، کە ئی بەرزەوبۊنە رەنگدانەوەی سەرکەفتن پلانەیل کارپیکردن و تەقەلا ئەندازیارییەیلەس ئەرا هازدارکردن بەرهەمهاردن لەڕی 18 بیر نەفتی پەیوەندیدار وە وێستگەگە.
