دویای ٣٦ ساڵ.. یەکەمین قایمقام ئەرا مەنەلی
سەرچەوەگە ئەرا ئاژانس شەفەق نیوز وت: ئەمینداریەتی گشتی ئەنجومەن وەزیرەیل، فەرمان ئەرکدارکردن پارێزەر فەرید تاڵب ئیبراهیم قەرەلووس وە پۆست قایمقام قەزای مەنەلی دەرکرد.
وتیش: ئەوەسا دویای تەواوکردن ریکارەیل یاسایی لەلایەن ئەمینداریەتی گشتی ئەنجومەن وەزیرەیل و ئیدارەی پارێزگای دیالە، قەرەلووس دەسوە کارەیلی کەێد.
لە ئادار گوزەشتە، وەزارەت پلانسازی دووارە نووەوکردن قەزای مەنەلی لە پارێزگای دیالە راگەیان، ک وەرجەیە لە قەزا کریاگە ناحیە.
لە سەردەم رژیم وەرین، وە تەمەی تەها یاسین رەمەزان ک ئەو سەردەمە وەرپرس دەسەی کاروبار باکوور بوی، لە ساڵ ١٩٨٧ قەزای مەنەلی کریا ناحیە، وەگەرد بارکردن کوردەیل مەنەلی و زەفتکردن ماڵ و زەوییان، لەناو پلان نەعریبکردن دیموگرافی وە هاندەرەیل سیاسی و مەزهەوی.
فرەی خەڵک قەزای مەنەلی لە کوردەیل فەیلی بوین، ک رژیم بەعس لە دویادویای ساڵەیل هەفتا و سەرەتای ساڵەیل هەیشتا لە سەدەی گوزەشتە، دەسکردە هەڵمەت گەورەیگ ئەرا بارکردنیان، و زەفتکردن رەگەزنامەی عراقی و ماڵ و زەوی و داراییان.
کوردەیل فەیلی، لە سەردەم ئەحمەد حەسەن بەکر لە ساڵەیل ١٩٧٠ و ١٩٧٥ کەفتنە وەر بارکردن و تەسفیر و دەسگیرکردن و کوشتن، ئیجا لە سەردەم سەدام حسێن لە پشتی لە ساڵ ١٩٨٠.
