داوەزیان ئەرا سفر.. هاوردەیل ئەمریکا لە نەفت عراقی لە نووترین هەفتە وسێد

شەفەق نیوز - بەغداد / واشنتۆن

داتایەیل وەڕێوەبەرایەتی زانیارییەیل وزەی ئەمریکی، ئمڕوو یەکشەممە، نیشان دان کە هاوردەیل وڵاتە یەکگرتگەیل لە نەفت خاو عراقی سفر بەرمیل لە رووژیگ تومار کردن ماوەی هەفتەی گوزەشتە، وە داوەزیان لە 46 هەزار بەرمیل لە رووژیگ لەو هەفتە کە وەرجی بۊ.

و وەپەی ئەو داتایەیلە کە چەو ئاژانس شەفەق نیوز کەفتەسە پی، کەنەدا کەفتە وەرجەی لیست گەوراترین هاوردەکارەیل نەفت خاو ئەرا وڵاتە یەکگرتگەیل ماوەی هەفتەگە وە بڕ 4 مەلیۆن و 352 هەزار بەرمیل لە رووژیگ، و وەدۊای ئەوەیش ڤەنزوێلا وە 782 هەزار بەرمیل لە رووژیگ، و دۊاتر سعودیە وە 362 هەزار بەرمیل لە رووژیگ هاتن.

 مەکسیک لە پلەی چوارەم هات وە بڕ 228 هەزار بەرمیل لە رووژیگ، و وەدۊای ئەوەیش بەڕازیل وە 202 هەزار بەرمیل، و دۊاتر غویانا وە 183 هەزار، و نێجیریا وە 181 هەزار، و کۆلۆمبیا وە 147 هەزار بەرمیل لە رووژیگ هاتن.

وەلی عراق سفر بەرمیل لە رووژیگ ماوەی هەفتەگە تومار کرد، تا بکەفێدە کووتایی لیستەگە لە شان ئەرجەنتین کە ئەویش سفر تومار کرد.

 داتایەیل داوەزیان لە هاوردەیل نەفت عراقی ئەرا وڵاتە یەکگرتگەیل نیشان دەن ماوەی هەفتەیل دویایین، کە 6 هەزار بەرمیل لە رووژیگ تومار کرد لەو هەفتە کە لە 14ی ئاب/ ئۆگۆستۆس کووتایی هات، دۊاتر سفر لە 21 ئاب، و 38 هەزار لە 28 ئاب، و 46 هەزار لە 4 ئەیلول/ سێپتەمبەر، وەرجە ئەوەگ گلەو بخوەێد و وە تەواوی بووسێد لە نووترین راپۆرت هەفتانە.