دادگای عراقی فەرمان دەسگیرکردن سەرۆک ئەنجوومەن پارێزگای میسان دەرکەێد (بەڵگەنامە)

شەفەق نیوز - بەغداد

دادگای لێکۆڵینەوەی کەرخ سێیەم، رووژ یەکشەممە، فەرمان دەسگیرکردنیگ لەبان سەرۆک ئەنجوومەن پارێزگای میسان مستەفا دعەیر دەرکرد، لەبان هەڕەشەکردنی وە یاخیبۊن مەدەنی و بڕین رییەیل، و هەڕەشەکردن لە حکومەت عراقی ئەرا دووارە وازکردن دەروازەی سنووری شیب وەرد ئیران.

 وەپەی بەڵگەنامەیگ دەرچگ لە دادگاگە لە رووژ 25 تشرین یەکەم / ئۆکتۆبەر 2026، نویسراییگ لە نویسینگەی سەرۆک ئەنجوومەن وەزیرەیل رەسیە کە داوای سکاڵا و جیوەجیکردن ریکارە یاساییەیل وەرانوەر سکاڵالیکریاگ گرێدە خوەی، لەبان بنەمای لێدوانەیلی کە پەیوەندیدارە وە هەڕەشەکردن لە حکومەتەگە وە یاخیبۊن مەدەنی و بڕین رییەیل، و داین مووڵەت سێ رووژ وەپی ئەرا دووارە وازکردن دەروازەی سنووری شیب.

بەڵگەنامەگە نیشان دا، کە قسەیل نۊنەر یاسایی ئەرا سەرۆک ئەنجوومەن وەزیرەیل مستەفا محمد حەمید حقووقی توومار کریاگە، و ناوەڕۆک سیدییگ پیشکەشکریاگ لەلایەنیەو چووڵ کریاگە، و بڕنویس وەرد پەڕاوەیل لێکۆڵینەوە هاوپیچ کریاگە.

 دادگاگە بڕیار دا فەرمان دەسگیرکردن مستەفا دعەیر دەرکەێد، وەپەی بڕگەیل ماددەی 224 / بەش دۊەم لە یاسای سزایەیل عراقی شمارە 111 ئەرا ساڵ 1969 هەموارکریاگ، وەگەرد ئاگادارکردن داواکاری گشتی.

 سەرۆک ئەنجوومەن وەزیرەیل عراقی عەلی زەیدی، شەوەکی دوشەممە، رێنمایی دا وە ئەنجامداین لێکۆڵینەوە وەرد سەرۆک ئەنجوومەن پارێزگای میسان مستەفا دعەیر عەبدولحەسەن، لەبان بنەمای هەڕەشەکردنی وە راگەیانن یاخیبۊن مەدەنی و بڕین رییەیل و "جیاوەکردن پارێزگاگە لە لەش عراق"، وە ناڕەزایەتی دەربڕین لەبان وەردەوامبۊن بەسانن دەروازەی سنووری شیب وەرد ئیران.

دعەیر، مووڵەت داۊدە حکومەت فیدراڵی، تا پەنجشەممەی ئایندە ئەرا دووارە وازکردن دەروازەی سنووری شیب، وە هەڕەشەکردن لە کۆنگرەیگ رووژنامەوانی کە لە دەروازەگە بەسیەی وە راگەیانن یاخیبۊن مەدەنی و بەسانن رییەیل و "جیاوەکردن پارێزگاگە لە لەش عراق" لە ئەگەر جیوەجینەکردن داواکارییەگەی.

ئی لێدوانەیلە هاەوەخت هاتن وەرد ئەو ناڕەزایەتییەیلە کە پارێزگاگە وەخوەی دی، کە لەناوی دەیان ناڕاز ری "بزەرگان" گرنگ بڕین کە وەرەو کۆمپانیایەیل نەفتی چوود، وە رەتکردن وەردەوامبۊن بەسانن دەروازەگە، لەناو بڵاوبۊنیگ ئەمنی لە دەورگرد خوەینشاندانەگە.

حکومەت عراقی لە 20 تشرین یەکەم / ئۆکتۆبەر ئیسە بڕیار بەسانن دەروازەی سنووری شیب وەرد ئیران داگە تا ئاگادارکردنیگ ترەک، لە وەختیگ وەزارەت ناوخۆی ئیرانی نیگەرانی خوەی لە بڕیارەگە نشان دا، وە دووپاتکردن ئەوە کە تەهران هیچ ئاگادارکردنیگ وەرین لەباوەتی لە بەغدادەو وەرنەگردگە.