دادگای عراقی دۊەم خانمە پەرلەمانتار خەێدە زیندان لە ماوەی چەن سەعاتیگ

شەفەق نیوز- بەغداد

دەسەی دەسپاکی فیدراڵی، ئمڕوو چوارشەممە، خەوەر دا لە دەرچگن بڕیاریگ دادگایی وە زیندانیکردن حەفت ساڵ لەبان پەرلەمانتار ئەشواق سالم حەسەن، وەرد پابەندکردنی وە گلەوداین نزیکەی 12 ملیار دینار، دەسکەفت نایاسایی و ئەو جەزرەوە کە یەکسانە وەگەردی، لە دۊەمین بڕیار دادگایی کە دەرچوود لە ماوەی چەن سەعاتیگ وەرانوەر خانمە پەرلەمانتاریگ لە دۆسیەی دەسکەفت نایاسایی، دۊای بڕیار زیندانیکردن پەرلەمانتار عالیە نسەیف.

 دەسەگە لە بەیاننامەیگ رەسیە ئاژانس شەفەق نیوز، وت، کە دادگای تاوانەیل نەهیشتن گەندەڵی ناوەندی بڕیاریگ ئامادەبۊن وە زیندانیکردن ئەرا ماوەی هەفت ساڵ لەبان ئەندام ئەنجومەن نۊنەرەیل ئەشواق سالم حەسەن دەرکرد، لەبان تاوان دەسکەفت نایاسایی، وەپەی بڕگەیل مادەی (19/دۊەم) لە یاسای دەسەی دەسپاکی و دەسکەفت نایاسایی شمارە (30 ئەرا ساڵ 2011).

وتیش کە دادگاگە تاوانبارەگە پابەند کرد وە گلەوداین بڕای دەسکەفت نایاسایی کە رەسێدە (2,114,820,000) ملیار دینار عراقی، و (2,924,100) مەلیۆن دۆلار ئەمریکی، لەبان چەسپانن جەزرەوەی دارایی کە یەکسانە وە دەسکەفت نایاسایی، وەپەی بڕگەیل مادەی (19/چوارەم) لە یاساگە.

 دەسەگە وەدۊاچگن کرد کە دادگاگە بڕیاریگ ترەک وە بەندکردن تون ئەرا ماوەی سێ ساڵ لەبان تاوانبارەگە دەرکرد لەبان تاوان شاردنەوەی زانیارییەیل لە فۆڕم خاوەنداریەتی، وەپەی بڕگەیل مادەی (19/پەنجەم) لە یاسای دەسەگە، لە وەختیگ بڕیار دا سزای تونتر لەبانی جیوەجێ بکەێد.

هەمیش دادگاگە پشتگیری دەسناین وەبان سامانەیل گواستراوە و نەگواستراوەگەی کرد، لە وەختیگ بڕیارەگە ماف وە دەسەی دەسپاکی فیدراڵی دا کە داوای قەرەبووکردن زەرەدەیل بکەێد، دۊای ئەوەگ بڕیارەگە پلەی بنبڕ وەخوەی گرێد.

 لە وەختیگ زۊتر لە ئمڕوو چوارشەممە، دەسەی دەسپاکی فیدراڵی خەوەر دا لە دەرچگن بڕیاریگ ئامادەبۊن وە زیندانیکردن هەفت ساڵ لەبان وە پەرلەمانتار عالیە نسەیف، لەبان تاوان دەسکەفت نایاسایی، وەرد پابەندکردنی وە گلەوداین فرەتر لە 61 ملیار دینار، کە نۊنەرایەتی بڕای دەسکەفت نایاسایی و ئەو جەزرەوەی داراییە کەێد کە یەکسانە وەلێ.