دەسپاکی هەڵکوتێدە بان شارەوانی ناسریە و شارەزایگ رویپێوی دەسگیر کەێد

شەفەق نیوز- زیقار

سەرچەوەیگ ئەمنی، رووژ دووشەممە، خەوەردا کە هیزیگ ئەمنی وە یاوەری تیمیگ لە دەزگای دەسپاکی هەڵکوتانە بان بینای شارەوانی ناسریە، و شارەزایگ رویپێوی لەبان دۆسیەیل گریەدار وە وەهەدەردان پۊل گشتی دەسگیر کردن.

سەرچەوەگە ئەرا ئاژانس شەفەق نیوز وت، کە "هیزە ئەمنییەگە شارەزا رویپێوییەگە لە شارەوانی ناسریە دەسگیر کردگە، وەپای فەرمانەیل گردن دادوەری کە لەبانی لە دادگای لێکۆڵینەوەی دەسپاکی لە زیقار دەرچگە".

هەمیش وت "دەسگیرکریاگە لەبان دۆسیەیل گریەدار وە وەهەدەردان پۊل گشتی داواکریاگە، و پرۆسەی دەسگیرکردنەگە لەناو بینای شارەوانی وەڕیەو چگ، و دۊای ئەوە ئەرا لایەنە پەیوەندیدارەیل بریا ئەرا تەواوکردن رێکارە یاساییەیل".