دیالە.. داوای ئاوەدانکردنەوەی سێ ئاوای کورد وەرجە ١٥ ساڵ قاعیدە ویرانیان کردیە
شەفەق نیوز/ وەرپرسیگ حکومەتی لە دیالە، ئمڕوو چوارشەممە، داوای ئاوەدانکردنەوەی ٣ ئاوای کورد کرد، ک لە ساڵ ٢٠٠٧ ریخریاگ قاعیدە ویرانیان کردیە، و قەرەبوکردن ٤٥٤ خیزان کورد لە دانشتگەیلی، وەو جۊرە ک وەگەرد قەوارەی زەرەدەیل گەپیان بگونجێد.
ئەحمەد سامر زەرگووش وەڕەوبەر ناحیەی سەعدیە، ئەرا ئاژانس شەفەق نیوز وت: ئاوایەیل (محمد حەیدەر، زەرگووش یەکەم، زەرگووش دویەم) وە تەواوی خاپوور کریان و خەڵکەگەی وەرەو شۊنەیلیگتر ئاوارە بوین و تا ئیسە گلەو نەخواردن.
زەرگووشی وتیش: ٩٥% لە خیزانەیل ئاوارە لەو ئاوایەیلە چینە خانەقین، و ئەوەکانیان چینە بەغداد و ناوچەیلیگتر، و هویچ قەرەبوویگ لە دەسچگن ماڵ و داراییان وە رەفتارەیل ریخریاگ قاعیدەی تیرۆریست وەرنەگردنە.
وتیش: ئەو خیزانەیلە تەنیا پیمەی وەزارەت کووچ و کووچبەرەیل وەرگردنە، و هویچ قەرەبوویگ لە زەرەدەیل هەرلە ٢٠٠٧ تا ئیسە وەدەسیان نەکەفتیە، و زوورکرد لەبان ئاوەدانکردنەوەی ئاوایە رمیایەیل تا هان دانشتگەیل ئەرا گلەوخواردن بیەێد.
وەرپرسە حکومەتیەگە دووپات کرد ک ریخریاگ قاعیدە پەلامار و رەفتارەیل تیرۆریی وەشیوەیگ مەزهەوگەری و کافرکردن دژوە ئەو ئاوای و ناوچەیلە کرد ک رەزامەنی لە هەسیی نەیاشتن لەماوەی ٢٠٠٥ – ٢٠٠٨.
