دیالە.. دەسگیرکردن توومەتباریگ وە بازرگانیکردن وە ئایەم و کارەیل جادووگەری
شەفەق نیوز ـ دیالە
فەرماندەیی پۆلیس دیالە، ئمڕوو شەممە، دەسگیرکردن توومەتباریگ راگەیان وە توومەت داواکریاگ وەپای مادەی (7)لە یاسای بازرگانیکردن وە ئایەم، کەفتیەسە ناو دۆسیەیل بازرگانیکردن وە ئایەم و کارەیل نوشتە و جادوو لە شار بەعقوبە.
فەرماندەیەگه لە بیاننامەیگ رەسیە ئاژانس شەفەق نیوز وت: مەفرەزەی فەوج فریاکەفتن دیالە پەنجە، وە بەشداری وەرد وەڕێوەبەر هەواڵگێری و بەش دژەتیرۆر دیالە و بەش بازرگانیکردن وە ئایەم لە وەڕێوەبەرایەتی بەڕەنگاربوین تاوانە رێکخریاگەیل توەنستن توومەتبار داواکریاگ دادگا دەسگیربکەن.
وتیش: تومەتبار کارەیل جادووگەری و نووشتە و هەڵخەڵەتانن وەبان هاوڵاتیەیل کردیە وەرانوەر بڕە پویلیگ، وەرجە ئەوەگ وەلایەن هێزە ئەمنی هاوبەشەیل دەسگیربکرێد.
دیاریکرد، رێکار یاسایی پێویست وەرانوەری گیریاس، ئامادەکریاس تا ئەرا لایەنەیل پەیوەنیدار کلبکرێد و وەپای یاسا سزا بیرێد.
