دیالە ... خنکیان ناخاڵەیگ لەحەمرین و زەخمداری دویەتیگ وە گولە وە مدوو کوڕ برای پەرلەمانتاریگ
شەفەق نیوز ـ دیالە
پارێزگای دیالە، ئمڕوو چوارشەممە، دوو رویداو جیا وەخوەی دی کە یەکیگیان خنکیان ناخاڵیگە لە دەریاچەی حەمرین و دویەم زەخمداری کوڕیگ وە گولە لە رویداویگ لە بازگەیگ ئەمنی لە ناحیەی قەرەتەپە.
سەرچەوەیگ ئەمنی وە ئاژانس شەفەق نیوز وت "گەنجیگ 17 ساڵان مەوقەی سناوکردن لە دەریاچەی حەمرین نقومبویە، و تیمەیل وەدادڕەسین تەرمەگە لە دەوروگەرد ناحیەی سەعدیە باکوور خوەرهەڵات پارێزگاگە دراوردن" وتیش "تەرمەگە ئەرا تەواوکردن رێکارەیل یاسایی کلکریا ئەرا پزیشک دادوەری".
لە رویداو ترەک سەرچەوەگە ئاشکرایکرد " کوڕ برای یەکیگ لە ئەندام پەرلەمانەیل وە خێرایی ماشین رانییە، و بازگەی چگنە ناو ناحیەی قەرەتەپە باکوور خوەرهەڵات دیالە رەدکردیە، پابەند وە فەرمان وسیان و وشکنین نەویە".
وتیش "ٚیەکیگ لە ئەندامە ئەمنیەیل تەقە لە ماشینەگە کردیە جویر تەقەلایگ ئەرا وساننی، یەکیگ لە گولەیل ماشینەگە بڕێد و لە ئەنجام دەس ئەو کوڕە زەخمدار کەێد کە لەناوی بویە، ئەرا چارەسەرکردن کلکریاسە خەستەخانە".
دیاریکرد، رویداوەگە لەدویای رێککەفتن لەناوەین هەردوگ لا کۆتایی هات وەبی وەرگردن رێکارەیل تونتریگ.
