دیالە تمیاسە ناو گەندەڵی.. دەسپاکی داوای سزادان ئەو حویتەیلە کەێد ک چەک ودەسەڵات ها پشتیان
شەفەق نیوز/ دەسەی دەسپاکی لە پەرلەمان عراق، ئمڕوو سێشەممە، داوای سزادان "حویتەیل و سومبلەیل گەندەڵی" لە پارێزگای دیالە کرد، ک پشت وە "ڤیتۆی حکومەتی حزبی بەسانە وچەک هاپشتیان"، و دیاری کرد ک پارێزگاگە تمیایە لەناو هەزاران لە باوەتەیل گەندەڵی لەوەر رخیگ لە وازکردنیان.
ناهیدە داینی سەرۆک دەسەگە ئەرا ئاژانس شەفەق نیوز وت: دژە گەندەڵی لە دیالە لە بەیاننامەیل راگەیانن و ئامارەیل هەژماری رەد نەکرد، وەبی هویچ ریکار دیاریگ لەبان حویتەیل و سومبلەیل گەندەڵی ک پشت وە ڤیتۆی حکومەتی و حزبی و زوان چەک بەسانە، و داوای ئاشکراکردن ئەنجامەیل لێکۆڵینەوە لە باوەتەیل گەندەڵی لە پارێزگاگە ئەرا ڕای گشتی کرد، ودەسکردن وە هەڵمەتیگ ئەرا رمانن حویتەیل و سومبلەیل گەندەڵی لە پارێزگاگە.
ناهیدە خان وتیش: دیالە تمیاسە ناو هەزاران لە باوەتەیل گەندەڵی تاریک ک هیمان لەناو نوێسینگە و رەفەیل گیر هاتنە وەبی جمەکردن، لەوەر رخیگ لە چزداین لایەنەیل دەسەڵاتدار وزاڵبوین چەکدارییان ک هیشت سوودەیل خزمەتگوزاری دیالە تاڵان بکریەن، وتەنیا لەبان پڕۆژەیلیگ سومبلی وراگەیانن بمینێد، ک وەگەرد یەک چارەک لە خوازینەیل و گرفتەیل خزمەتگوزاری نیەپووڕێد.
خانمە سەرۆک دەسەی دەسپاکی دووپات کرد ک ئەو گەندەڵی تاریکە پەک چەرخ ئاوەدانی و بیناکردن لە پارێزگاگە خستیە و هیشتەی بوودە خاوەن بەدترین خزمەتگوزاری لەناو پارێزگایل، هەرچەن شوینیگ بازرگانی و ستراتیژی جیاوازیگ دیرێد و دوو مەرز وەرد ئیران وچەن مەرزیگ وەرد هەرێم کوردستان وبەغداد پایتەخت وئەو پارێزگایل هەس.
داینی وتیش: دیالە ری بازرگانی گرنگیگە، وهەڵقەی بەسانن ناوبەین گشت پارێزگایەیلە، باوجی حکومەتەیل وەرین ئی شایستەیلە بەرهەم نەکردن، لەوەر زاڵبوین گەندەڵەیل و دەسیان لەناو گشت مەرزەیل داهات و سوودەیل دارایی هەس، لەناو بیدەنگیگ حکومەتی ئاشکرایگ لەلایەن دەسەیل دەسپاکی لە جیوەجیکردن ئەرکەیلیان وە شیوەیگ پیشەیی.
