دیالە ئامار قوربانیەیل رویداو خنکیان راگەیەنێد

شەفەق نیوز/ نویسینگەی کۆمیسیۆن باڵای ماف مرۆڤ لە دیالە، ئمڕوو چوارشەممە، ئاشکەرایکرد ساڵانە زیاتر لە 20 رویداو خنکیان توومارکریەێد وە هووکارە جیاوازەیل.

سەڵاح مەهدی مجمەعی وەڕێەوبەر نویسینگەگە وە ئاژانس شەفەق نیوز وت، دیالە ساڵانە زیاتر لە 20 پسای مردن توومار کەێد وە رویداو خنکیان و مەلەوانی لە چەم و جوەیل لە وەر نەوین مەلەوانگەی نمونەیی و کەمی هوشیاری سەڵامەتی، دووپاتکرد قوربانیەیل خنکیان زیاتریان گەنجەیل و کوڕن لەوەر ئەزرەتکردنیان ئەرا مەلەوانی هەرچەنە مەلەوانگەیل دیارکریاگ هەس باوجی لەوەر  کەمدەسی و بیکاری و نیەتوەنن بچن ئەرای.

مجەمعی داوای دروسکردن مەلەوانگەییگ کەێد ئەرا لە باوەشگردن گەنجەیلە ودویرەوکەفتن لە رویداوەیل مردن، وە لایگیش ریگیری لەیان کریەێد لە رەفتارەیل رخبەر جویر مادەی هوشبەر و کارەیل کۆمەڵایەتی قبوڵنەکریاگ، لەهەمان وەخت باس لەو قوربانیەیلە کرد ک وە هووکار کەفتنەخوار ماشین و خنکیانیان لە چەم و جوەیل رویداویە.

وەڕێەوبەر نویسینگەی ماف مرۆڤ داوا لە دامودەزگایەیل کۆمەڵایەتی و ئاینی کرد دەسبکەنە هەڵمەتیگ هوشیاری گشتی ئەرا قەیەغە کردن مەلەوانی لە چەم و جوەیل وەتایبەت ئەوانەگ خاس نین لە مەلەوانی.