خوەیکوشتن دویەتیگ و مردن زیندانییگ لە زیقار
2023-07-24T07:29:48+00:00
شەفەق نیوز/ سەرچەوەیگ ئەمنی لە پارێزگای زیقار، ئمڕوو دووشەممە، خەوەردا لە توومارکردن دوو رویداو خوەیکوشتن دویەتیگ و مردن کەسیگ لەناو یەکیگ لە زیندانەیل پارێزگاگە.
سەرچەوەگە ئەرا ئاژانس شەفەق نیوز وت: دویەتیگ لە تەمەن ٢٧ ساڵان خەڵک قەزای سوق شیوخ باشوور پارێزگای زیقار وە پەتیگ لەناو ماڵەگەی لە گەڕەک عەسکەری خوەی دادە سێدارە و خوەی کوشت، وتیش؛ هیمان رەوشەیل خوەیکوشتن دویەتەگە نادیارە، ک تەرمەگەی ئەرا پزشک دادوەری بریا.
سەرچەوەگە وتیش: زیندانییگ لەناو تەمەن چل ساڵە لەناو زیندان حووت لە ناسریە گیانی لەدەسدا.
سەرچەوەگە دیاری کرد ک ئەو زیندانی مردیە فەرمان وەسێدارەدان لەبانی دەرچگە وەگورەی مادەی ٤ تیرۆر، و هوکار مردنی ئاشکرا نەویە.
