تایبەت- وەزارەت دەیشتە ئەمریکی بەغداد خەێدە وەر شایستەییگ دارایی یەکلاییکەر لەباوەت ئیران
شەفەق نیوز- واشنتۆن/ مستەفا هاشم
وەزارەت دەیشت ئەمریکی، رووژ چوارشەممە، باس هەڵمەتیگ ئابووری فراوان کرد ئەرا بڕین کڕەیل پۊلدارکردن لە تاران، وە داواکردن لە بەغداد ئەرا تیکەڵبۊن تەواو لە وەدۊاکەفتن چالاکییە داراییەیل نایاسایی ئەرا مسۆگەرکردن جیگیربۊن داراییەگەی و پارێزگاری لە هاوبەشیی وەگەرد واشنتۆن.
یەیش لە وەڵامیگ راسەوخۆ هات ئەرا ئەو پرسیارەیلە کە ئاژانس شەفەق نیوز لە وەزارەتەگە کردیە لەباوەت چۊنیەتی دۊرەوخستن عراق لە لیکەفتەیل سزایەیل ئەمریکی لە سای هوشدارییەیل هاوپەیمانی وەڕێوەبردن دەوڵەت لە "رەوشیگ دارایی سەخت".
گردەوبوین سەرکردەیل هاوپەیمان وەڕێوەبردن دەوڵەت لە بەغداد دووپات لەبان هەوەجەی بیلایەنکردن ئابووری عراقی لاواز لە لیکەفتەیل فشارەیل ناودەوڵەتی کردۊد، لە ناو رخەیل زیایبۊیگ لەناو ناوەندەیل سیاسی و بانکی لە فراوانبۊن بازنەی کۆتوبەندەیل لەبان جۊلەی دۆلار و هەواڵە دەیشتەکییەیل.
قسەکەر وە ناو وەزارەت دەیشت ئەمریکی ئەرا ئاژانس شەفەق نیوز وت، کە عراق رێڕەویگ نوو وە هاوبەشییگ تەواو وەگەرد ویلایەتە یەکگرتگەیل دەس وەپی کردگە، دووپات کرد لەبان پشتگیری ئاشکرای واشنتۆن ئەرا تەقەلایەیل ریگریکردن لە وەکارهاوردن خاکەیل عراقی چۊ سەکوویگ ئەرا پەلامارەیل و دروسکردن هاوبەشییگ ئابووری قایم، وەپای ئەوەگ سەرۆک دۆناڵد ترەمپ دووپاتی کرد لە مەوقەی پێشوازیکردنی لە سەرۆک وەزیرەیل عراقی عەلی زەیدی لە واشنتۆن لە ناوڕاس تەموز گوزەشتە.
باوجی قسەکەرەگە وە ئاشکرا پەیوەندی خستە ناوەین ئی پشتگیرییە و هەوەجەیل رۊوەڕۊبۊن دارایی هەرێمی، دووپات کرد لەبان دەسوەپیکردن ئەوەگ باسی کرد وە ئۆپەراسیۆن "وەپەراویزخریاگ ئابووری" وە ئامانج بڕین دەمارەیل ژیان لە سیستەم ئیرانی و کردنە ئامانج ئەو کەسەیل و قەوارەیلە کە تیکەڵن لە رەفتارەیل دارایی نایاسایی ئەرا بەرژەوەنیی، وە تایبەت ئەوانەگ گریەدارن وە بانکەیل ئیرانی لە دەیشت.
وەزارەت دەیشت ئەمریکی، لەڕی شەفەق نیوزەو، داوایگ ئاشکرا لە حکومەت عراقی و کۆمەڵگای ناودەوڵەتی کرد ئەرا پشتگیریکردن ئی رێکارەیلە و سزاداین ئەوانەگ تیکەڵن، و سەرکردایەتی سیاسی و دارایی لە بەغداد خستە وەر "شایستەییگ یەکلاییکەر" ئەرا جیاوەکردن تەواو لەناوەین دەمارەیل ئابووری نیشتمانی و توڕەیل پۊلدارکردن هەرێمی کە کەفنە ژیر سزایەیل ناودەوڵەتی.
وەزارەت خەزانەی ئەمریکی، دووشەممەی گوزەشتە، خەوەردا لە دەسوەپیکردن "ئۆپەراسیۆن وەپەراویزخریاگ ئابووری" دژ وە ئیران، ئەوەیش وە رێنماییەیل لەلایەن سەرۆک دۆناڵد ترەمپەو.
وەپەی وەزیر خەزانە سکۆت بیسێنت، ئی هەڵمەتە کە "بی پیشینەس" ئیران کەێدە ئامانج وەگەرد "ئەوانەگ توانای دەن و پشتگیریی کەن".
