بارھەڵگرەیل ری هەولێر- کەرکوک بڕن لە ناڕەزایەتی دژ وە رێکارەیل سۆنار
شەفەق نیوز- کەرکوک
شمارەیگ لە خاوەن بارھەڵگرەیل جۊر "گەڵابی"، ئمڕوو شەممە، ری هەولێر- کەرکوک لە بازگەی دارەمان لە سنوور ناحیەی ئاڵتون کۆپری بڕین، لە ناڕەزایەتی دژ وە ناچارکردنیان ئەرا رەدبوین وە ناو ئامێرەیل سۆنار لە بازگەگە.
هاوڕێ حەسەن، یەکیگ لە رانندەیل بارھەڵگرەیل، ئەرا ئاژانس شەفەق نیوز وت: رێکارەیل وشکنین وە سۆنار کارەیلیان ئاڵۆز کەێد و شێواوی ئەرایان دروس کەێد، وە تایبەت کە ئەوان وە شێوەی رووژانە کار کەن و ناچارن زیاتر لە پەنج جار لە چگن و هاتن وە بازگەگە رەد بوون.
دیاری کرد دووارەبوین رێکارەیل وشکنین لە هەر جاریگ بارگرانی لەبانیان دروس کەێد و کاریگەری لەبان سروشت کارەیلیان دێرێد، و داوا لە لایەنەیل پەیوەنیدار کرد چەو وە ئی رێکارەیلە بخشیننەو و میکانیزمیگ پوڕیاگ پەیا بکەن کە رەچاو سروشت کار شۆفێرەیل قەلاب بکەێد و ئاسانی جویڵەی بارھەڵگرەیل مسۆگەر بکەێد.
ناڕازییەیل ریەگە لە وەردەم جویڵەی ماشینەیل بڕین، کە بویە مدوو قەرەباڵغی هاتوچوی لەبان ری ناوەین هەر دوو پارێزگای هەولێر و کەرکوک، لە وەختیگ دەسوەجێ وەخت دووارە وازکردن لە وەردەم جویڵەی هاتوچوو دیار نەوی.
شمارەیگ لە خاوەن ماشینەیل بارهەڵگر، ئیوارەی رووژ پەنجشەممە، خوەنیشاندانیگ شەوانە لەبان ری ناودەوڵەتی ناوەین کەرکوک و هەولێر رێکخستوین، لە ناڕەزایەتی دژ وە رێکارەیل حکومی نوویگ کە بارھەڵگرەیل گواستنەوە کەرەستەیل بیناسازی گردەو.
