بەسیان سێ بەنزینخانە لە خانەقین ودەسگیرکردن کەسەیلگ
شەفەق نیوز/ سەرچەوەیگ ئەمنی لە خانەقین، ئمڕوو شەممە، خەوەردا لە بەسانن سێ بەنزینخانە و دەسگیرکردن کارمەنەیلیگ لەناویان چوینکە فەرمی نیین، وخاوەنەیلیان ئویشن؛ مووڵەت فەرمی دیرن ودویای ساڵ ٢٠١٧ نووەو نەکریاگە.
سەرچەوەگە ئەرا ئاژانس شەفەق نیوز وت: دەزگا ئەمنیەیلە لە خانەقین، ئمڕوو سێ بەنزینخانە زیایچگ ک یەک بۆزەر دیرن بەسان، ئەوەیش ئەرا نواگردن فرووشتن وقاچاخی نایاسایی ئەرا سوتەمەنی.
سەرچەوەگە وتیش: یەکیگ لە بەنزینخانەیل رمانن، وکارمەنیگ لەناوی وەگەرد یەکیگ لە خاوەن ئی بەنزینخانەیلە دەسگیر کریان.
وتیش: هەڵەمتەیلیگ وەردەوم لەی باوەتە لە ماوەیل کەم گوزەشتە هەس، ودووپات کرد لە رمانن ئەو بەنزینخانەیلە چوینکە خاوەنیان پاپەی هوشداریکردن لە لایەنەیل پەیوەندیدار نەوینە.
لەلای خوەیانیش خاوەن ئەو بەنزینخانەیلە دووپات کردن ک مووڵەت فەرمی وەرجە رویداوەیل ١٦ی تەشرین یەکەم ٢٠١٧ (ریفراندۆم هەرێم کوردستان) لەلاین ئیدارە خانەقین دیرن، وداوا پەیاکردن میکانیزمیگ یاسایی یا مووڵەتیگ وەگورەی رینمایل ئەرا رێکخستن کار ئی بەنزینخانەیلە کردن.
خاوەن ئەو بەنزینخانەیلە ئەرا ئاژانس شەفەق نیوز دیاری کردن ک خاوەن ماشین وموەلدەیل ماڵی پشت وەی بەنزینخانەیلە بەسانە جویر سەرچەوە ئەرا سوتەمەنی، وهەمیش بوینەسە سەرچەوەی ژیانیگ ئەرا دەیان خیزان لە شارەگە.
