بەرزەوبوین نەفت لەناوەین هاوسەنگیکردن بازاڕەیل لەناو ئاڵۆزییەیل کەنداو و هاز هەناردەی خوەرهەڵات ناوڕاس

شەفەق نیوز - بەغداد

نرخەیل نەفت، ئمڕوو سێشەممە، بەرزەو بوی وەگەرد وەردەوامبوین رخدارییە ئەمنییەیل لە خوەرهەڵات ناوڕاس، لە وەختیگ کە هاز هەناردەی نەفت خام لە ناوچەگە و ئازادکردن یەدەگەیل فریاگوزاری وڵاتەیل کۆمەڵەی هەفت، نگرانییەیل لەبان کەمی دابینکردن کەمەو کرد.

گرێبەستەیل ئایندەی خام برێنت 27 سەنت، یا 0.3% بەرزەو بوی ئەرا 100.59 دۆلار ئەرا بەرمیلیگ، لە وەختیگ گرێبەسەیل ئایندەی خام خوەرئاوای تەکساس  ئەمریکی 30 سەنت، یا 0.3% زیای کرد ئەرا 89.73 دۆلار ئەرا هەر بەرمیلیگ، لە نزیک ساعت 0330 وە وەخت گرینویچ.

داتایەل بارکردن ئاشکرا کرد  هەناردەی نەفت خام لە خوەرهەڵات ناوڕاس لە چەن رووژ  کۆتایی ئەیلوول/ سێپتەمبەر لە ئاستەیل توومارکریاگ وەرجە جەنگ رەدکرد، وە گاڵداین بووژانەوەی هەناردەی سعودیە، وەردەوامبوین پەلامارەیل ئەرا بان ژیرخان نەفت شانشینەگە و فرەوبوون پەلامارەیل ئیرانی ئەرا بان جویلەی کەشتیگەل لە ناوچەگە.

 نەفت لە وڵاتەیل کەنداو، بێجگە لە ئیران، بەرزەو بوی ئەرا زیاتر لە 81% لە ئاستەیل وەرجە جەنگ لەماوەی ئەیلوول/ سێپتەمبەر، لە وەختیگ هەناردەی ئیرانی داوەزی ئەرا سفڕ وە مدوو ئابلوقەی ئەمریکی.

لە گام ترەک ئەرا کەمکردنە نگرانییەیل دابینکردن، وڵاتەیل کۆمەڵەی هەفت رووژ جومعە رەزامەنی دان لەبان دەرکردن 100 ملیۆن بەرمیل لە دیزل و نەفت خام لە یەدەگەیل فریاگوزاری، هەمیش پەیمان دان لەبان خوەپاریزی لە چەسپانن کۆسپ لەبان هەناردەی هاز (ئێنێرجی) دویای فشارەیل وەلایەن سەرۆک ئەمریکی دونالد ترەمپ.

هەمیش داوەزیان یەدەگەیل نەفت و بەرزەوبوین نرخەیل بارکردن لە کەنداو ئەرا ئاسیا ئەرا ئاستەیل پەیمانیی نوو، بەشدار بوی لە مەنستن بازاڕەیل نەفت لەژیر فیشار رخدارییەیل دابینکردن و گوواستنەوە.