کاروانەیلیگ ئاسمانی لەوەر خوەڵوتوز لە عراق وسیەن

شەفەق نیوز/ سەرچەوەیگ چەودێر، ئمڕوو سێشەممە، خەوەردا ک فڕۆکەخانەی ناودەوڵەتی بەغداد، کاروانەیل ئاسمانیی لەوەر خراوی کەشوهەوا وەسان.   

سەرچەوەگە ئەرا ئاژانس شەفەق نیوز وت: فڕۆکەخانەی ناودەوڵەتی بەغداد بڕیار دا وەشیوەیگ وەختانە کاروانەیلی لە و ئەرا فڕۆکەخانەگە بوسنێد، لەوەر خراوی کەشوهەوا و کەمبۊن ئاست نووڕستن.           

راگەیانن فڕۆکەخانەی نەجەفیش راگەیان: ناچار بۊمن کاروانەیل ئاسمانی بوسنیمن تا ئەوەنە خوەڵوتوزەگە تەواو بوود، چۊنکە ئاست نووڕستن رەسیە کەمتر لە ٥٠٠ مەتر. 

راگەیانن فڕۆکەخانەگە وتیش: ئەگەر ئاست نووڕستن رەسیە زیاتر لە ٨٠٠ مەتر، دووارە کاروانەیل فڕۆکەخانەگە کەفنە ری.