١١ پارێزگا پشووی فەرمی سوو راگەیەنن وەبوونەیگ ئایینی (نووەوکردن)

شەفەق نیوز - بەغداد

پارێزگار بەغداد، عەتوان عەتوانی، ئمڕوو شەممە، فەرمان دا وە  پشووی فەرمی لە دیوان پارێزگاگە و فەرمانگەیل سەر وە پێ، بیجگە فەرمانگەیل خزمەتگوزاری ئەرا، سوو یەکشەممە، وەبوونەی کووچ دوایی فاتمە زەهرا.

لە سەلاحەدین، پارێزگار هەیسەم زەهوان، لە بەیاننامەیگ کە رەسیە  ئاژانس شەفەق نیوز ، فەرمان دا وە  پشووی فەرمی سوو یەکشەممە لە قەزایەیل بەلەد و دجێل و ئامرلی و دووز،  ئەرا بەرزراگرتن هەمان بوونە، بیجگە فەرمانگەیل خزمەتگوزاری و ئەمنی ئەرا مسۆگەرکردن وەردەوامبوین لە پێشکەشکردن خزمەتەیل وە هاوڵاتیەیل.

لە دیالە، پارێزگار عەدنان شەممەری، لە بەیاننامەیگ ترەک، راسپارد وە  پشوو فەرمی لە گشت فەرمانگەیل دەوڵەت لە پارێزگاگە، بیجگە فەرمانگەیل خزمەتگوزاری کە وەردەوام بوون لە خزمەتەیلیان وە هاوڵاتیەیل.

لە هەمان وەخت، ئەنجومەن پارێزگەی موسەنا بڕیار دا وە  پشووی فەرمی لە گشت فەرمانگەیل و دەزگایەیل حکومی لە پارێزگاگە ئەرا سوو یەکشەممە.

 پارێزگایەیل بەسرە، زیقار، بابل، دیوانیە، واسیت، موسەنا،  پشووی فەرمی ئەرا رووژ یەکشەممە راگەیاننن، وەبوونەی کووچ دویایی فاتمە زەهرا (دویەت پێغەمبەر ئیسلام محەمەد کوڕ عەبدوڵڵا).

ئەنجومەن پارێزگەی نەجەف، پەنجشەممەی گوزەشتە، بڕیار دا ئەرا پشوو فەرمی یەکشەممەی ئایندە وەبوونەی کووچ دویایی فاتمەی زەهرا.