پارێزگایگ سنووری ٥ ریکار ئەرا نواگردن گرانی بەێد
شەفەق نیوز/ حکومەت خۆجێی لە پارێزگای واست، ئمڕوو چوارشەممە، بڕیار دا چەن ریکارگ و دروسکردن دەسەیل چەودێریکردن ئەرا نرخ خوەراک و نواگردن گرانیی دا، و هەڕەشەی ئەوانەگ دەسکاری وە نرخەیلە وە سزایل سەختیگ دا.
محمد جەمیل مەیاحی پارێزگار واست لە بەیاننامیگ رەسیە ئاژانس شەفەق نیوز وت: وە هۊردی چەودیری گرانی خوەراک سەرەکی کەیمن، ئەو کارە ک ئەوەسا وەخراوی تیەێدە بان ژیان مەردم و رەوش ئابووری گشتی و بار هاووڵاتی سەنگین کەێد.
وتیش: دەسەی باڵای چەودێریکردن نرخەیل لە بازاڕەیل، گردەوبۊنیگ کردن ئەرا باسکردن لەو ریکارەیلە ک لە واست بکریەن ئەرا سووکەوکردن تیژی ئی قەیرانە و کەمەوکردن زەرەدەیلی لەبان خەڵک پارێزگاگە وەگورەی توانا، و وەگورەی رینمایل ئەنجومەن وەزیرەیل.
مەیاحی دیاری کرد ک فەرمان وە دروسکردن دەسەێلیگ لە گشت کەرتەیل ئیداری دایمن تا وە شیوەی رووژانە چەودیری بازاڕەیل بکەن، و نرخەیل خواردەمەنی وە یەک لیست دیاری بکەن، تا چەودیری بازاڕەگە و ئاست پابەندی خاوەن دوکانەیلە وەی نرخەیلە بکەن.
و جەخت کرد ک بازرگان خاوەن دوکانەیل ک پێشێلکاری نرخەیلە کەن خریەنە دادگا، و کار ئەرا وازکردن مەرز زرباتیە کریەێد ئەرا هاتن چشتەیل خواردەمەنی سەرەکی وەگورەی خوازین بازاڕ، و ریداین وە خاوەن کۆمپانیا گەپەیلە ئەرا وازکردن مەرزەیل فرووشتن راستەوخۆ لە گشت قەزا و ناحیەیلە ئەرا ماوەی دوو مانگ.
مەیاحی داوا لە خەڵک پارێزگاگە کرد هاوکاری وەگەرد لایەنەیل پەیوەندیدار بکەن تا چەودری نرخەیلە بکەن، و بڕوا وە شافەیلە نەکەن ک خوازن نرخەیلە بەرزەو بوود و هان مەردمەگە دەن تا چشت فرە بسینن و لەماڵ هەڵیبگردن، وە بەهانەی ئەوە ک ئەوەسا چشت لە بازاڕ نێمینێد.
پارێزگار واست هان بازرگانەیلەی واست دا لەبان هاوکاری وەگەرد لایەنەیل پەیوەندیدار، و لەخود وەختەگە سپاس لەو بازرگانەیلە کرد ک وەهەس وەرپرسایەتی کار کەن.
مەیاحی وتیش: چارەکردن قەیرانەگە وە پاڵپشتیکردن کارت خوەراک کریەێد ک ئەوە خاسترین چارەسەرە، ک خوەی سیستەم ئاسایش خوەراک توکمەیگە، و پاڵپشتیکردن راسییگە ئەرا خیزانە کەمدەسەیلە ئەگەر چشتەیل کارتەگە وە بڕ و چین زیای کریا.
