یونیسێف: 300 هەزار مناڵ لیبی زەرەد وەپیان رەسیە
2023-09-19T06:58:43+00:00
شەفەق نیوز/ دویای ئەوەگ زریان تونیگ وڵات لیبیا گرێدەو یونیسێف راگەیان، نزیکەی 300 هەزار مناڵ وە مدوو زریانەگەی دانیال زەرەد وەپیان رەسیە.
یونیسێف ئوشێد؛ " زریانەگە کاریگەری وەبان نزیکەی 300 هەزار مناڵ دیرێد و دەرئەنجامەیل لافاو ئەرا مناڵەیل ویرانکەرترن لە خود رویداوەیل تون کەشوهەوا".
شارەزایەیل ئاشکەرایکردنە، مناڵەیل لە رویوەرویبوینەوەی کارەساتەیل لاوازن چوینکە مەترسی فرەیگ هابانیان جویر تویشهاتن وە بیماری، بەدخۆراکی، تێکچگن سیستم هویکارەبوین و تونوتیژی.
نەتەوەیل یەکگرتگ رخی چوود لە بڵاوبوین زگچین و کۆلێرا و بەدخۆراکی لە لیبیا، بیجگە لەوەگ رخیان چوود ئەو مناڵەیلە داڵگ و باوگیان لەدەسدانە بوونە نێچیر مەترسیەیل تونوتیژی و بازرگانی وەپیانکردن.
یونیسێف دیاریکردیە، ئەرا جواوداین ئەو کارەسات و قورتارکردن مناڵەیل لیبیا وەلایەن کەم هەوەجە کەن وە شەش ملیۆن و پەنسەد هەزار دۆلار.
