پولیس ئەڵمانیا دەیان لە هاندەرەیل پاریس سان جێرمان دەسگیر کەێد
شەفەق نیوز/ ئمڕوو چوارشەممە، پولیس ئەڵمانیا 59 هاندەر یانەی پاریس سان جێرمان دەسگیرکرد، وەرجە بازیەگەی یانەگەی لە خول پاڵەوانیەتی ئەوروپا وەرانوەر شتوتگارت ئەڵمانیا.
وەگورەی زانیارییەیل پولیس، بەڵگە بویە کە دەستان ئەوە کەێد کە ئەو دوو گروپ هاندەرە پلان داشتنە لە دەیشت بازیگاگە بکەنەی جەنگ، پولیسیش راگەیان کە هاندەرەیل فەرەنسا وەبی بلیت گەشتی کردنە ئەرا شتوتگارت تا بەشداری بازیەگە بکەن، وەگورەی خەوەر ماڵپەڕ “DW عەرەبیە ئەڵمانی”.
پولیس وتیش: ئەو هاندەرەیلە دەسگیرکریانە چشتەیلیگ وەپییان بویە تا دەموچەویان بپووشن، ئەوەیش پشتڕاس کردگە کە تا شەوەک پەنجشەممە لە دەسوەسەری مینن.
پولیسی شارەگە لە بەیاننامەگەی وتیش: لە ری لێکۆڵینەوەیگ فراوان و وە هاوکاری نزیک وەرد پولیس پاریس، ئاژاوەگیڕە فەرەنسییەیل لە وێستگەیگ گەورەی قەتار و لە هۆتێلە جیاوازەیل شار شتوتگارت دەسگیرکریان.
وتیش: "ئەرا ریگریکردن لە رویدان ئاژاوە تا کۆتایی بازیەیل لە رووژ چوارشەممە، ئاژاوەگەیل پاریسەو تا شەوەکی سوو دویای وەرگردن ڕەزامەنی دادوەری گریانە".
کارستن هۆفلێر، جیگر وەڕێوەبەر پولیس ئیتاڵیا وت: هەرکەسیگ باێدە شار شتوتگارت ئەرا ئەنجامدان تاوان تونوتیژی لە دەیشت بازیگاکە، لە بازیەگە دویرەو خریەێد.
چل و هەفت هاندەر یانەی شتوتگارت، کە گوایە تەقەلای وەردەوەردە دانە وەرد هاندەرەیل سەردانکەر، چگنەسە ناو ناوەند شار و ناوچەی باد کانستاد کە بازیگای شتوتگارت هاناویر قەیەغە کریان، چوینکە بەشیگیان چەک وەپییان بویە.
