کوشیان و زەخمدارەی وە پەلامار ئیسرائیلی نوویگ لە باشوور لوبنان

شەفەق نیوز- بەیرووت

میدیایەیل راگەیانن عەرەبی، ئمڕوو شەممە، خەوەردان کە هیزەیل ئیسرائیلی پەلاماریگ نوو وە فرۆکەیگ بیفڕۆکەوان لەبان ناوچەی دێر زەهرانی لە قەزای نەبەتیە لە باشوور لوبنان جیوەجی کردن.

لە لای خوەییش، وەزارەت تەندروسی لوبنانی، راگەیان کە ئامار پەلامارە ئیسرائیلییەگە لەبان دێر زەهرانی رەسیەسە دوو کوشیاگ و 9 زەخمدار.و لە هەڵوێستیگ فەرمی، سەرۆک وەزیرەیل لوبنانی نەواف سەلام، شەرمەزار پەلامارەیل ئیسرائیلی لە شەوەکی زۊ ئمڕووەو کرد، و وەسفی کرد وە ئەوەگ "فرە رخدار و تەقەلایەیل جیگیرکردن ئارامی شیونێد".

وسەلام، لە لێدوانیگ رووژنامەوانی، وت کە "شەهیدەیل پەلامارە ئیسرائیلییەگە لەبان ژیرخان سەربازی نین و مناڵەیل و ژنەیلیش وەو جۊرە نین".

 سەلام وتیش کە "رەفتارکردن وەگەرد هەر ژیرخانیگ سەربازی تەنیا وەرپرسیاریەتی دەوڵەتە، و ماف ئەوە نیەدە ئیسرائیل زەۊیەیلەمان پێشێل بکەێد".

 میدیایەیل راگەیانن لوبنانی، لە وەختیگ گوزەشتە لە ئمڕوو شەممە، خەوەر دان کە سێ پەلامار ئیسرائیلی شەوەکی ئمڕوو دەوروبەر ناوچەی نەبەتیەی فەوقا و لایەیل ناوچەی ئەنسار لە قەزای نەبەتیە لە باشوور لوبنان کردنە ئامانج.

میدیایەیل راگەیانن وتن، کە هێلیکۆپتەرەیل ئیسرائیلی پەلامار لەبان بەرزاییەیل "عەلی تاهر" جیوەجی کردن، لە وەختیگ ئەو بەرزاییە و دەورگرد "نەبەتیەی بانین" تۊش پەلامار 

 تووپخانەیی خەسیگ هاتن کە وەکارهاوردن گولەیل فۆسفۆر لەخوەی گرد.