کوشیان نزیکەی 100 کەس وە لافاوەیلیگ لە باکوور خوەرهەڵات هیندستان
شەفەق نیوز- نیودەلهی
دەسەڵاتەیل هیندی، ئمڕوو جمعە، کوشیان 97 کەس و ئاوارەبۊن زیاتر لە 170 هەزار کەس ترەک راگەیان وە مدوو ئەو لافاوەیلە کە ویلایەت ئاسام لە باکوور خوەرهەڵات وڵاتەگە گردەو.
ئاژانس "فرانس پرێس" دیاری کرد کە ویلایەت ئاسام یەکیگ لە بەدترین لافاوەیل لەماوەی چەن ساڵیگە وەخوەیەو دۊنێد، کە بۊەسە مدوو نوقمبۊن ئاوایەیل و ژیرئاوکەفتن ماڵەیل و زەوییە کشاوەرزیەیل، و دەیان هەزار کەس ناچار کرد پەنا بوەنە ناوەندەیل داڵدەدان وەختانە دۊای ئەوەگ چەمەیل هاتنە سەر و ئاوەیان رەسیە ماڵەیل.
هەرلیوا، ئاو فرەتر لە 14 هەزار هێکتار لە زەوییە کشاوەرزیەیل گردەو، کە ئەویش رووبەریگە نزیکەی یەک جار و نیم رووبەر شار پاریس بوود.
رووژنامەوانیگ لە ئاژانس "فرانس پرێس" بڕیگ ماڵ دیە کە ئاو لافاوەگە تا نیمەیان گردۊد، وەگەرد دارەیل هەڵکەنیای، و ماشینەیل ژیر خەرگ لە ناوچەی سیفاساگار، کە فرەترین زەرەد وەپی رەسیە.
هیمانتا بیسوا سارما، سەرۆک وەزیرەیل ویلایەت ئاسام، ئمڕوو جمعە، ڤیدیۆیگ بڵاو کرد کە دڵ داڵگ و باوگ کوڕیگ تەمەن 13 ساڵان دەێدەو کە مەوقەی تەقەلای ئەرا رزگارکردن سەگ ماڵیەگەی لەناو ئاو لافاوەیل گیان لەدەس دەێد.
نویسان "بایەسە هیچ داڵگ و باوگیگ رووژیگ ناچار نەون ماڵئاوایی لە مناڵەیلیان بکەن".
لە لای خوەییشەو، وەزیر تەندروسی و چەودیاری خیزان هیندی جیه بی نادا، کە پەنجشەممە سەردان ناوچە زەرەدمەنەگە وە لافاوەیل کرد، وت "قەوارەی کاولکاریەگە فرە گەورەس" تا رادەیگ کە گلەوداین کارەیل ئەرا رەوش ئاسایی خوەیان وەخت خوازێد.
هەمیش وت کە "ئاوەگە ئاوای وە دۊای ئاوایتر گرێدەو".
چۊ فرەی ناوچەیل نیمچە کیشوەر هیندی، لافاوەیل لە ویلایەت ئاسام چشتیگ باوە لەماوەی وەرز وایەیل وەرزی لە ناوەین حوزەیران/ یۆنیۆ و ئەیلول/ سێپتەمبەر، وەختیگ چەم براهماپوترا، گەوراترین چەمەیل هیند، وەگەرد فرەیگ لە لقەیلی بەرزەو بوود وەلی شارەزایەیل ئۊشن کە ئاڵشتکاریکردن کەشوهەوا، وەگەرد گەشەپیدان بی پلان، ریژە و تونی کاریگەری ئی کارەساتەیل زیاتر کەن.
دانیشتگەیل و وەرپرسەیل وتن کە پرۆسەیل دراوردن نایاسایی زوخاڵ لە ویلایەت ناجالاند هاوسا تون لافاوەیلە زیاتر کردگە، و دیاری کردن کە لافاوەیل ئیسە رەسنە ناوچەیلیگ کە لە جاران رخداری ژیرئاوکەفتن لەبانیان نەۊە.
سارما وت کە نیاز دیرێد ئی پرسە لەلای حکومەت ناوەندی لە نیودەلهی بکەێد.
گرووپ "کلایمت ترینێدز" کە تایبەتمەنە وە پرسەیل کەشوهەوا وت کە بەرزەوبوین تونی لافاوەیل لە ویلایەتەگە گلەو خوەێد ئەرا "کارلیک لە ناوەین گەرمەوبوین جەهانی و ئاڵشتکاریەیل لە جویلەی چەمەیل، وەگەرد ئەوەگ دانیشتگەیل رخداری زیاتر لەبانیانە، کە یەیش کەێدە مدوو ئەوەگ ئی لافاوەیلە فرەتر دووارەو بوون و ئاڵووزتر و زەرەدبەخشتر بوون".
