گورزەیل سعودیە شوینیگ و وێستگەیگ سزەمەنی لە سەنعا کەنە ئامانج

گورزەیل سعودیە شوینیگ و وێستگەیگ سزەمەنی لە سەنعا کەنە ئامانج
2026-11-22T09:18:53+00:00

شەفەق نیوز - سەنعا

فڕۆکە جەنگییەیل سعودیە، رووژ یەکشەممە، شەش پەلامار ئاسمانی کردنە بان ناوچە جیاجیایل لە سەنعا پایتەخت یەمەن کە ها ژیر کۆنترۆڵ گرووپ "ئەنساروڵڵا" (حووسییەیل)، لە ناویان شوینە سەربازییەیل و وێستگەیگ سزەمەنی، وەپەی ئەوەگ دەزگایەیل راگەیانن خەوەر دانە.

ئاژانس "ریا نۆڤۆستی" رووسی، لە زوان سەرچەوەیلەو وت کە وتنە پەنج پەلامار پێگەیل لە کۊەی عەتان، لە باشوور خوەرئاوای پایتەخت کردنەسە ئامانج، کە لەورا بارەگای سەرکردایەتی لیوایەیل مووشەکی سەر وە سوپای وەرین یەمەن هەس، لە وەختیگ پەلامار شەشەم وێستگەیگ سزەمەنی لە لای خوەرئاوای سەنعا کردگەسە ئامانج.

ئی هەڵکشانە تیەێد دۊای چەن ساعتیگ لە راگەیانن هێزەیل هاوپەیمانی عەرەبی ئەرا وەرپەرچداین فڕۆکەیگ بێفڕۆکەوان و مووشەکیگ بالیستی کە گرووپەگە وەرەو ریاز پایتەخت سعودیە و ناوچەی خوەرئاوای شانشینەگە وەشاندۊدەیان.

لە چوارچێوەیگ پەیوەندیدار، گرووپ حووسییەیل، ئیوارەی شەممە، سعودیە تۆمەتبار کردن وە ئەنجامداین 71 پەلامار ئاسمانی و مووشەکی کە پارێزگایەیل بەیزا و عومران و حەججە و سەعدە و لەحج و تەعز و جەوف و مەئریب کردنەسە ئامانج، لە ماوەی 24 سەعات گوزەشتە.

لە وەرانوەر یە، سوپای یەمەن راگەیان وە ئەنجامداین 816 پرۆسەی وەئامانجگردن لە دژ حووسییەیل لە ماوەی 24 سعات، لە ناویان 65 پرۆسە لەڕی فڕۆکە بێفڕۆکەوانەیل و 14 پەلامار ئاسمانی، لەناو ئۆپەراسیۆن "فەجر یەمەن"، وە ئاماژەداین وەرەو ئەوەگ کە پرۆسەیلە بۊنەسە هووکار کوشیان و زەخمداربۊن 149 لە ئەندامەیل گرووپەگە.

سەرۆک ئەنجومەن سەرکردایەتی سەرۆکایەتی یەمەن، رەشاد عەلیمی، لە پەنجەم تشرین یەکەم/ ئۆکتۆبەر گوزەشتە راگەیانۊد لە دەسپێکردن ئۆپەراسیۆن "فەجر یەمەن"، وە پشتگیری هاوپەیمانی عەرەبی وە سەرکردایەتی سعودیە، وە ئامانج گلەوداین دامەزراوەیل دەوڵەت و سەنعا پایتەخت لە ژیر کۆنترۆڵ گرووپەگە.

Shafaq Live
Shafaq Live