ئوردن.. سزای سێدارە ئەرا 3 کەس وە تاوان جیوەجیکردن پەلاماریگ "تیرۆریستی" لە کەرەک
شەفەق نیوز- عەممان
دادگای ئاسایش وڵات ئوردن، ئمڕوو یەکشەممە، بڕیار وە لەسێدارەداین دەرکرد ئەرا سێ تاوانبار وە مدوو جیوەجیکردن ئەو پەلامارە ک لە شارۆچکەی حەموود لە پارێزگای کەرەک، لە 23ی تشرین یەکەم/ ئۆکتۆبەر 2026 رویدا، لە دویای تاوانبارکردنیان وە "بڕیگ تاوان تیرۆریستی"، وەپای ئەوەگ ئاژانس خەوەری ئوردن بڵاوی کرد.
ئاژانسەگە باس کرد دادگا سێ توومەتبارەگە تاوانبار کرد وە توومەتەیل جیوەجیکردن کردەوەیل تیرۆریستی کە بۊنە مدوو کوشیان کەسەیل وە هاوبەشی، لە نۆ رویداو، بیجگە جیوەجیکردن کردەوەیل تیرۆریستی وە وەکارهاوردن چەک و تەقەمەنی لە دوو رویداو.
هەمیش بڕیارەیل تاوانبارکردنەگە هەڵگرتن چەک و تەقەمەنی وە مەبەست وەکارهاوردنی لە کردەوەیل تیرۆریستی، و پلانگێڕی ئەرا جیوەجیکردن کردەوەیل تیرۆریستی وە وەکارهاوردن چەک، و بانگەشەکردن ئەرا هویرەیل گرووپیگ تیرۆریستی گردەو.
وتیش؛ دادگا یەکیگ لە تاوانبارەیل هەمیش تاوانبار کرد وە توومەت پێشکەشکردن پۊل وە مەبەست وەکارهاوردنی لە پاڵپشتی دارایی ئەنجامداین کردەوەیل تیرۆریستی، وەپشتبەسانن وە یاسای بەرەنگاربۊن شوردن پۊل و پاڵپشتی دارایی تیرۆر.
سێ چەکدار، لە تشرین یەکەم/ ئۆکتۆبەر گوزەشتە، پەلامار بەشداربۊیەیل لە پرسەیگ لە ناو کەنیسەی قەدیس جاورجیۆس لە ئاوای حەموود لە پارێزگای کەرەک دان، و وە خەسی تەقە کردن، کە بۊیە مدوو کوشیان نۆ کەس و زەخمداربۊن 25 کەس ترەک، وەرجە ئەوەگ لە شوینەگە بوان.
لە دویایش، دەسەڵاتەیل ئوردن، دەسگیرکردن توومەتبارەیل راگەیانن، لە ماوەی ئۆپەراسیۆنیگ ئەمنی کە سێ ساعەت وەردەوام بۊ.
