واشنتۆن سێ ری خەێدە نوای ئیران: هەڵوەشیان پاسداران یا راپەڕین جەماوەری یا گلەوخواردن ئەرا دانوسەنین

شەفەق نیوز- واشنتۆن

وەزیر گەنجینەی ئەمریکی سکۆت بێسنت، ئمڕوو چوارشەممە، وت کە لە نوای ئیران سێ ری هەس لە سای ئەو فشارە سەربازی و ئابوورییەیلە کە رۊوەڕۊیان بوود، کە خوەی دۊنێد لە دروسبۊن بەشەوبوین لەناو سوپای پاسداران، یا جۊلەیگ جەماوەری دژ وە رژیمەگە، یا گلەوخواردن تاران ئەرا مێز دانوسەنینەیل وەگەرد واشنتۆن.

لێدوانەیل بێسنت لە پەراویز گردەوبوین وەزیرەیل دارایی کۆمەڵەی بیست لە ئاشڤێل لە ویلایەت نۆرس کارۆلاینا هات، کە رووشنایی خستە بان ئەوەگ ئیدارەی سەرۆک دۆناڵد ترەمپ وەردەوامە لە زیایکردن فشار ئابووری لەبان ئیران و سوپای پاسداران.

بێسنت وت کە ویلایەتە یەکگرتگەیل وەردەوام بوود لە وەدۊاکەفتن سامان و پۊلەیل گریەدار وە سوپای پاسداران لە دەیشت، و دووپات کرد کە واشنتۆن شوین هەژمارەیل و سامانەیلیگ وە سەدان ملیۆن دۆلار ناسێد و نیاز دیرێد کار ئەرا سڕکردنیان بکەێد.

هەمیش وت کە ئیدارەی ئەمریکی سیاسەت "سفر وەخشین" وەگەرد ئەو دامەزراوە و کۆمپانیایەیلە کە رەفتار وەگەرد سوپای پاسداران کەن جیوەجی کەێد، و هەڕەشەی "خنکانن رژیمەگە لەڕۊی ئابوورییەو" دا.

وەزیر گەنجینە ئاشکرا کرد کە واشنتۆن خوەی ئامادە کەێد ئەرا راگەیانن سزایەیل لەبان بانکیگ نوو لەی هەفتە، وە مەرجیگ رێکارەیل زیاتر وە شیوەیگ نیمچە هەفتانە وە دۊای باێد، وەگەرد توانای ئامانجگردن کۆمپانیایەیل وەکراداین فڕۆکەیل و لایەنەیل و دامەزراوەیل تر کە رەفتار وەگەرد سوپای پاسداران کەن.

وەزارەت گەنجینەی ئەمریکی لە 24 ئاب گوزەشتە هەڵمەتیگ ئابووری نوو وە ناو "پرۆسەی دەرکریاگ ئابووری" دەس وەپێ کرد، کە ئامانج لەلی بڕین توڕەیل پۊلدارکردن و بازرگانییە کە ئیران ئەرا خوەیلاداین لە سزایەیل و پۊلدارکردن سوپای پاسداران وەکاریان تیارێد.

ئی لێدوانەیل بێسنتە هاوەخت وەگەرد نووەوبۊن رۊوەڕۊبۊنەوەی سەربازی ناوەین واشنتۆن و تاران تیەێد، دۊای جیوەجیکردن گورزەیل نوویگ لەلایەن هیزەیل ئەمریکی لەبان شوینەیل ئیرانی، و جواوداین ئیران وە تەقەلاکردن موشەکەیل و فڕۆکەیل بێفڕۆکەوان وەرەو شوینەیلیگ کە هیزەیل ئەمریکی لە ناوچەگە لەخوەیان گرن.

ئیدارەی ترەمپ ئۊشێد کە ئامانج لە گردەوکردن فشار سەربازی و سزایەیل ئابووری ئەوەسە تاران ناچار بکەێد ئەرا گلەوخواردن ئەرا دانوسەنینەیل و وازهاوردن لە بەرنامە ئەتۆمییە سەربازییەی، لە وەختیگ ئیران رکدارە لەبان ئەوەگ هەر دانوسەنینەیلیگ نووو هەوەجە وە وەسانن پەلامارەیل ئەمریکی و پیشکەشکردن گەرەنتی دیرێد لەباوەت هەڵگردن سزایەیل.